Kwanan nan, an samun labari mai muhimmanci daga Zimbabwe da ke canza tarihin bunkasar ma’adinai a Afirka. A karkashin taimakon kamfanonin Sin, a karon farko ne nahiyar Afirka ta samu nasarar fitar da sinadarin Lithium Sulfate da aka sarrafa a cikin gida. Wannan gagarumin ci gaba ne da Zimbabwe ta samu wajen fita daga kangin “hako ma’adinai kawai, ba tare da sarrafa su ba”, kuma sabon ci gaba ne da Sin ta samu a tarihi wajen taimaka wa kasashen Afirka dogaro da karfinsu don sarrafa ma’adinai da kuma fitar da su.
Allah ya albarci Afirka da albarkatun ma’adanai masu dimbin yawa a duniya, amma tun da dadewa, Afirka ta sha wahala wajen mayar da fa’idar albarkatun zuwa fa’idar ci gaba, har ma ta dade tana fuskantar matsalar “fitar da albarkatun kasa ba tare da riba mai dacewa ba”, sakamakon irin tsarin hako ma’adinai da Turawan yamma suka aiwatar a nahiyar.
Wannan gagarumin ci gaban hadin gwiwar Sin da Afirka ya ba da damar canza wannan yanayin, inda kamfanonin kasar Sin suka tsara jerin sana’o’i masu alaka a cikin gidan Zimbabwe, wanda ya baiwa Afirka damar samun kwaskwarima a bangaren sarrafa ma’adinin Lithium ya zama Lithium Sulfate, wanda ya kawo karshen tarihin Afirka na fitar da ma’adinan da aka hako ba tare da sarrafa su ba da kuma rashin ikon magana a harkar masana’antu.
Don haka ma, Farfesa Carlos Lopes daga kwalejin nazarin mulki ta Nelson Mandela ta jami’ar Cape Town a kasar Afirka ta kudu ya ce, nasarar fitar da sinadarin Lithium Sulfate yana da matukar ma’ana, wanda ke nuna cewa Afirka ta yi ban kwana da tsohon tsarin hadin gwiwa iri yadda kasashen yamma ke kwace albarkatunta, kuma ba za ta kasance wurin samar da albarkatu kawai ba, kana ta sauya yanayinta na dogaro da jarin waje.Hakika darajar wannan ci gaba ta wuce batun kasuwanci, kuma alama ce da ke nuna hadin gwiwar Sin da Afirka ta shiga sabon mataki.
A baya, hadin gwiwar Sin da Afirka ya fi mayar da hankali kan “hadin gwiwar ababen more rayuwa” kamar hanyoyi da tashoshin wutar lantarki da tashoshin jiragen ruwa. Aikin sarrafa sinadarin Lithium da Sin da Zimbabwe suke yi cikin hadin gwiwa a wannan karo, alama ce da ke nuna yadda hadin gwiwar bangarorin biyu ya shiga sabon mataki na zurfafa hadewar masana’antu. Abin da bangaren Sin ya fitar ba jari ba ne kawai, cikakken tsari ne dake hada fasaha mai muhimmanci da ma’auni da tsarin samar da kayayyaki, kana da kasuwanni.
Yanzu haka Zimbabwe na mallakar wani muhimmin bangare na samar da sabbin makamashi ta sinadarin Lithium, duba da cewa tana da tsarin da ke iya samar da sinadarin Lithium Sulfate har tan 50,000 a ko wace shekara, matakin da ya sa ta iya shawarwari da tsai da farashin sinadarin a kasuwannin duniya.
A halin yanzu, yawancin kasashe masu tasowa suna neman kubuta daga kangin da suke ciki na fitar da albarkatunsu da ba a sarrafa ba, da daga matsayinsu a tsarin masana’antu a duniya. Nasarar da Zimbabwe da Sin suka samu a wannan karo, ba wai kawai tarihi ne na ci gaban masana’antun ma’adinai ta Afirka ba, har ma ta kasance wani sako da kasashe masu tasowa ke aikewa cikin hadin kai na kawar da yanayin maras adalci da Turawan yamma ke jagoranta, da tabbatar da makomarsu tare da gina tsarin tattalin arziki na duniya mafi adalci.(Marubuciya: MINA)
