Sojojin rundunar Operation HAƊIN KAI (OPHK) sun samu gagarumar nasara a yankin Arewa maso Gabas, inda suka hallaka manyan jagororin ’yan ta’adda, suka kuma tarwatsa ayyukan ISWAP da Boko Haram, tare da daƙile wasu laifuka ta hanyar samun bayanan leƙen asiri da kai farmaki cikin tsari.
A wata sanarwa da jami’in yaɗa labarai na OPHK, Laftanar Kanar Sani Uba, ya fitar a Maiduguri, an tabbatar da hallaka Julaibib, wani babban kwamandan ISWAP da ke aiki a yankin Gujba na Timbuktu Triangle, a wata arangama da ta faru a kusa da Kimba, ƙaramar hukumar Damboa, a ranar Juma’a, 30 ga Janairu, 2026. Ya ce kisan jagoran ya jefa ’yan ISWAP cikin ruɗani, inda aka ce an kuma hallaka wasu daga cikinsu yayin farmakin.
- Gwamnatin Jihar Borno Za Ta Dawo Da ‘Yan Gudun Hijira 3,000 Daga Kamaru
- ’Yan Ta’adda Sun Kai Wa Ƙauyuka 2 Hari A Adamawa
Uba ya ƙara da cewa, a wani artabun na daban, sojoji tare da haɗin gwuiwar Civilian Joint Task Force (CJTF) sun yi kwanton ɓauna tsakanin Ngazalgana da Lamusheri a Jihar Borno, inda suka hallaka ’yan ta’adda uku. An ce sojojin sun yi amfani da bayanan sirri wajen kafa tarko a wata hanya, lamarin da ya sa suka yi nasara, tare da kwato bindigogi AK-47 guda biyu daga wajensu.
A ranar 29 ga Janairu, 2026, sojoji sun kuma yi arangama da ’yan Boko Haram/ISWAP a Tsokorok, ƙaramar hukumar Gwoza, inda suka tilasta musu ja da baya bayan sun hallaka guda ɗaya daga cikinsu, tare da kwato babura guda biyu. A Adamawa kuma, sojoji sun amsa kiran gaggawa daga al’ummar Barama a Mubi North, inda suka dakile yunƙurin fashi, suka cafke mutane biyu da ke ƙoƙarin kai hari ga wani ɗalibi na Federal Polytechnic, Mubi, tare da ƙwato adda, da kwamfutoci tafi-da-gidanka, wayoyi da na’urar caji.
Hakazalika, a wani sintiri da aka yi tare da ’yan sa kai a hanyar Amtasa–Washim a ƙaramar hukumar Hong, sojoji sun fafata da ’yan ta’adda, suka tilasta musu guduwa, tare da ceto wata mata da aka sace. An kuma ƙwato bindigar AK-47 da harsasai da sauran makamai.
