Sojojin Njeriya ƙarƙashin Operation CLEAN SWEEP sun ceto wani mutum da aka yi garkuwa da shi mai suna Nura Yar’adua tare da rusa wasu maboyar ‘yan ta’adda a Jihar Katsina. An gudanar da aikin ne ta hanyar rundunar 17 Brigade Strike Group.
Rahotanni daga Sojojin sun ce an gudanar da farmakin ne a yankin Tuga da ke ƙaramar hukumar Matazu, inda aka yi amfani da bayanan sirri, da. na’urorin sa ido da kuma hare-haren sama ƙarƙashin Operation FANSAR YAMMA.
Sojojin sun ci gaba da kai farmaki har cikin dajin Fafu, inda suka rusa sansanonin ‘yan ta’adda da maɓoyarsu. A yayin aikin, an gano gawarwaki biyu, sannan aka ceto Nura Yar’adua a ɗaure a wani sansani da ake zargin na wani shugaban ‘yan ta’adda ne.
An ba wanda aka ceto taimakon gaggawa kafin a kai shi Asibitin Koyarwa na Tarayya da ke Katsina domin ƙarin kulawa. Sojojin kuma sun ƙwato dabbobi da aka sace, ciki har da shanu 36, tumaki 280 da jakuna biyu.
