A yayin da kakar noman 2026 ta fara kankama, Gwamnatin Jihar Kano, ta bullo da wasu sabbin samarwa fannin aikin noman jihar matakai.
Manufar ita ce, don ta ƙara ƙarfafa wa manoman jihar guiwa, musamman duba da hauhawar farashin kayan abinci da kuma tsadar kayan aikin noma.
Kazalika, gwamnatin ta kuma zuba jari a bangaren noman rani, ta hanyar samar da kayan aiki na zamani da ƙirƙiro da shirye-shiyen da za su taimaka wa manoman jihar, domin samar da gurbi mai yawa.
Ya zuwa yanzu, gwamnatin ta samu nasarar kusan kashi 80 cikin ɗari, na burin da take son cimma a fannin.
Kano dai, ta dogara ne kacoka, kan aikin noma wajen ƙara bunƙasa tattalin arziƙinta, musamman domin samar da wadataccen abinci da yaƙar talauci da ƙara ƙarfafa tattalin arziƙin mazauna karkara.
Kwamishinan Ma’aiktar Aikin Noma da Kula da Albarkatun Ƙasa, Dakta Yakubu Ɗanjuma Mahmud, ya danganta wannan nasarar kan samar da kyawawan tsare-tsare a ƙarƙashin gwamnatin Abba Kabir Yusuf, tun bayan ɗare karagar shugabancin jihar a 2023.
A cewarsa, ɗaya daga cikin matakan da gwamnatin ta ɗauka, su ne; tattara bayanan manoman jihar, domin yin amfani da su wajen samar da tsarin inganta fannin.
Wasu daga cikin nasarorin da gwamnatin ta samar a cewarsa, sun haɗa da sake farfaɗo da noman rani a ɗaukacin faɗin jihar.
“Mun maido tare da kuma gyara kadadar noma 1,230 da kuma ƙasar yin noma a jihar, tare da dawo da wajen yin noman rani da ke Kadawa,” a cewar Mahmud.
Ya ƙara da cewa, gwamnatin ta ɗauki matakan daƙile yawan samun rikici a tsakanin manoma da Fulani Makiyaya da ke jihar, musamman ta hanyar katange kimanin Buratalai masu tsawon kilo mita 1,300.
A cewarsa, yanzu haka, gwamnatin na shirin fara wani babban aiki na gina Dam a dajin Ɗantsoshiya, wanda ya kai mai kimanin, tsawon kilo mita biyu da za a iya tara ruwan da zai kai lita miliyan uku.
“Dam ɗin zai taimaka wajen samar da ruwa ga kimain kadada 1,250, idan aka kammala aikin,” in ji Kwamishinan.
Ya ci gaba da cewa, gwamnatin ta kuma gina ƙananan Dam 11 a yankunan Albasu, Shanono, Gari, Dawakin Kudu, Rogo, Ajingi da kuma Bichi.
Mahmud ya ce, waɗannan Dam-dam ɗin, za su iya wadata kadadar noma kimanin 1,200, waɗanda kuma ake sa ran za su karaɗe kimanin kadada 2,000.
“A yanzu haka, akwai kuma wasu sabbin kimanin kadadar noman rani 2,000 da aka tsara za a samar a wasu yankunan jihar,” in ji Mahmud.
Ya ƙara da cewa, gwamnatin ta kuma samar da kayan aiki ga manoman jihar, inda ya ce; a shekaru uku na hawan gwamnatin, jihar ta samar da Tirelolin takin zamani sama da 623 ga manoman jihar.
