Jami’an rundunar ‘yansanda a Jihar Kwara sun kama mutane shida da ake zargi da aikata garkuwa da mutane a ƙaramar hukumar Baruten ta jihar.
Haka kuma, ‘yan sandan sun kwato makamai da wayoyin hannu guda shida daga hannun waɗanda ake zargin, bayan wani samame da aka gudanar bisa sahihan bayanan sirri a yankin.
Mai magana da yawun rundunar ‘yan sandan jihar, Adetoun Ejire-Adeyemi, ta tabbatar da kama waɗanda ake zargin a wata sanarwa da ta fitar ranar Asabar.
Ta ce an kama masu laifin a ranar Alhamis, 30 ga Afrilu, 2026. Ta ƙara da cewa: “A ranar 23 ga Afrilu, 2026 da misalin ƙarfe 12:30 na dare, an kawo rahoton satar wani mutum mai suna Isaq J. daga ƙauyen Boriya ta hanyar Okuta. ‘Yan bindigar sun nemi kuɗin fansa na Naira miliyan hamsin (₦50,000,000). Bayan samun rahoton, rundunar ta fara farautar masu laifin, inda aka ƙara matsa musu lamba, wanda ya kai ga sakin wanda aka sace.”
“Daga baya, a ranar 30 ga Afrilu, 2026 da misalin ƙarfe 8:15 na dare, an kama wani Mohammed Shede daga ƙauyen Boriya dangane da lamarin. A yayin bincike, ya amsa laifin bayar da bayanan sirri ga wasu ‘yan ƙungiyar da ake kira ‘Smalley’ da ‘Borugujo’, wanda ya taimaka wajen bibiyar wanda aka sace har aka kama shi a gonarsa.”
Ta ce ƙarin bincike ya kai ga kama wasu da ake zargi, ciki har da Abubakar Aliu (wanda ake zargi da kula da makaman ƙungiyar), Abu Sonkpia, Saliu Yakubu, da Sanni Sakariyau, duk daga ƙauyen Boriya.
Ta ƙara da cewa waɗanda ake zargin sun amsa laifinsu na hannu a satar mutumin da kuma wani hari na fashi da makami da aka kai wa wani Muhammed Manu a wannan ƙauye.
Kayayyakin da aka kwato daga hannunsu sun haɗa da bindigogi biyu na gida da kuma wayoyin hannu guda shida.
Ta kuma ce ana ci gaba da farautar sauran ‘yan ƙungiyar da suka tsere, da wasu abokan aikinsu biyu da har yanzu suke ɓoye.
