Tsohon Gwamnan Jihar Zamfara kuma tsohon Shugaban Ƙungiyar Gwamnonin Nijeriya, Sanata Abdulaziz Yari, da alama ya fara sabawa da rayuwar attajiri mai tasiri a harkokin kasuwanci, musamman a fannin makamashi da samar da makamashi.
Yari, wanda aka zaɓa Sanata mai wakiltar Zamfara ta Yamma a shekarar 2023, ya yi yunƙuri mai ƙarfi na zama Shugaban Majalisar Dattawa jim kaɗan bayan shiga majalisar inda har ya kusa kai yawan ƙuri’un da Shugaban Majalisar Dattawa na yanzu, Godswill Akpabio, ya samu.
A yayin wannan takara, Yari ya girgiza tsarin siyasar majalisar, tare da zargin cewa wasu daga cikin abokan siyasarsa sun yi masa butulci duk da tabbacin da ya yi cewa suna tare da shi.Sai dai daga irin rayuwar da yake yi a yanzu da kuma yadda ya karkata zuwa harkokin kasuwanci, mutum zai iya tunanin cewa Yari na shirin rage yawan shiga harkokin siyasa, yana fitowa ne kawai lokaci zuwa lokaci a Majalisar Dattawa inda yake wakiltar al’ummar Mazaɓar Zamfara ta Yamma.
A ƙarshen shekarar da ta gabata, Yari ya zama sabon shugaban kamfanin Geregu Power PLC, inda ya maye gurbin Femi Otedola, tare da karɓar ragamar gudanar da kamfanin samar da makamashi.Wannan ciniki mai darajar ɗaruruwan miliyoyin daloli ya gudana ne tsakanin kamfanin MA’AM Energy Ltd na Yari da kamfanin Amperion Power Distribution Company Ltd na Otedola, yayin da aka ƙiyasta darajar Geregu Power da kusan naira tiriliyan 2.83.
Duk da haka, da kuma yadda yake nuna sha’awa ga harkokin kasuwanci, alamu na nuna cewa Yari, bai juya baya ga siyasa gaba ɗaya ba, duk da cewa ba kasafai ake ganinsa a tarukan siyasa ko wasu muhimman harkokin siyasa a jihar ba.
Kafin zaɓen fidda gwani na APC, wanda aka tantance masu neman tikitin jam’iyyar zuwa Majalisar Dokoki ta Ƙasa, Yari bai halarci taron masu ruwa da tsaki da aka shirya domin cimma matsaya kan masu neman muƙaman zaɓe ba.Kusan dukkan manyan fitattun ‘yan siyasar Zamfara, sun halarci taron ciki har da tsoffin gwamnoni Ahmad Sani Yarima, Mahmuda Shinkafi, da Bello Matawalle.
Haka kuma, shugabannin jam’iyya a matakin jiha da ƙasa, tare da sanatoci masu ci kamar Sahabi Yau Kaura, da Ikra Aliyu Bilbis, sun kasance a wurin taron.Sai dai duk da rashin halartarsa, Yari ya samu tikitin takarar Sanata na APC a mazaɓarsa cikin sauƙi ba tare da wata gagarumar adawa ba.
A halin yanzu ma, ƙungiyoyin matasa suna yaƙin neman ganin Shugaban ƙasa ya naɗa Yari a matsayin Darakta Janar na Kwamitin Yaƙin Neman Zaɓensa, inda suke faɗaɗa wannan gangamin zuwa ga ƙungiyoyi da masu ruwa da tsaki masu alaƙa da shugaban ƙasa.
Jagorantar yaƙin neman zaɓen shugaban ƙasa na iya zama wata dama da za ta sake dawo da Sanata Yari, cikin zafin fafatawar siyasa, duk da cewa a yanzu ya fi karkata ga harkokin kasuwanci da makamashi.
