Rundunar Hukumar Kula da Shige-da-Fice ta Ƙasa (NIS) reshen Jihar Neja ta tabbatar da kisan ɗaya daga cikin jami’anta tare da jikkata wani bayan harin ɓa-zata da wasu ƴan bindiga suka kai musu a yayin da suke gudanar da aikin sintiri da sa-ido a jihar.
Kakakin Rundunar Hukumar NIS a Jihar Neja, Mukhtar Abubakar, shi ne ya tabbatar da faruwar lamarin a cikin wata sanarwa a Minna, inda ya bayyana cewa maharan sun auka wa jami’an ne su biyu a lokacin da suke tsaka da gudanar da aikin sa-ido na yau da kullum domin daƙile zirga-zirgar baƙi ba bisa ƙa’ida ba.
A cewar sanarwar, ƴan bindigar sun kashe jami’in mai suna Mista Babagiwa a take tare da ƙone gawarsa, wadda aka gano bayan kwanaki biyu da faruwar harin, kuma tuni aka yi masa jana’iza bisa koyarwar addinin Musulunci. Shi kuwa abokin aikinsa mai muƙamin Sufeto ya samu munanan raunuka sakamakon saran adduna da maharan suka yi masa, amma ya yi nasarar kuɓuta kuma a halin yanzu yana asibiti yana samun kulawar likitoci.
Rundunar ta NIS ta jaddada cewa wannan kisan gillar ba zai karya musu gwuiwa ba wajen kare iyakokin ƙasar da daƙile kwararar ɓata-gari, inda ta bayyana aniyarta ta ci gaba da sauke nauyin da doka ta ɗora mata duk da matsalolin tsaro da ake fama da su a yankunan kan iyakar.
