Rundunar ’yansandan gundumar kudancin Indiya ta kama wani dan Nijeriya mai shekaru 36, wanda aka bayyana sunansa kawai da Emmanuel, bisa zargin gudanar da wata masana’anta da ke kera miyagun kwayoyi masu karfi, ciki har da MDMA da heroin.
PUNCH Metro ta ruwaito daga wani rahoto da jaridar Times of India ta wallafa a ranar Litinin cewa Emmanuel, wanda ake zargin yana zaune a Indiya ba bisa ka’ida ba, an kama shi ne “tare da heroin da aka shirya domin sayarwa.”
- Jakadan Sin: Cudanyar Al’adu Za Ta Taimaki Yunkurin Daidaita Hulda Tsakanin Sin Da Amurka
- Gobara Ta Hallaka Mutum 2, Ta Lalata Dukiya Ta Biliyan 1.59 A Bauchi
Rahoton, wanda aka wallafa a ranar Asabar, ya bayyana cewa an gano kakin gwaje-gwajen kera miyagun kwayoyin ne a cikin gidan da bai ja hankali ba na wanda ake zargin, da ke yankin Debli a kudancin Delhi.
“An kwace adadi mai yawa na kayan da ake bukata domin hada miyagun kwayoyin, tare da heroin da aka riga aka sarrafa.
“A cewar ’yansanda, an adana kimanin kilogiram 16 na kayan lu’ulu’u da kuma kilogiram 16 na kayan toka masu kama da hatsi, wadanda ake amfani da su a matsayin tushe wajen hada miyagun kwayoyi, a cikin gidan.
“Abubuwan da aka kwace sun kuma hada da kilogiram 51 na ruwaye da aka adana a cikin kwantena da dama, da kuma kwalabe 30 na gilashi marasa lakabi, dukkansu an tanade su ne domin sarrafa sinadarai na MDMA da heroin. Gaba daya, an kwato kilogiram 113 na kayan hada miyagun kwayoyi.”
Rahoton ya kara da cewa heroin da lu’ulu’un MDMA da za a iya samarwa daga wadannan sinadarai za su kai darajar kudade masu yawa (crores) a kasuwannin duniya.
A cewar rahoton, DCP Ankit Chauhan ya ce an samu nasarar cafke wanda ake zargin ne a ranar 20 ga Janairu, lokacin da wata tawaga karkashin jagorancin ACP Mukesh Walia da SHO Paras Nath Berma suka kama dan Nijeriyar yayin da ake zargin yana kan hanyarsa ta sayar da heroin da aka riga aka sarrafa.
“’Yansandan suna sintiri ne a kasa lokacin da suka hango wanda ake zargin. Yunkurinsa na gujewa ’yansanda ya ci tura, lamarin da ya kai ga bincike da aka gano tarin heroin mai inganci da darajarsa ta haura kudi crore daya.
“Amma yayin da binciken tambayoyi ya zurfafa, lamarin ya wuce kamen yau da kullum kan miyagun kwayoyi, ya koma gano wata cibiyar kera miyagun kwayoyi mai tsari da kwarewa,” wani babban jami’in ’yansanda ya shaida wa Times of India.
An ce ’yansanda sun ci karo da sinadarai da aka adana a cikin kwantena da dama yayin da suke binciken gidansa.
“Wannan dimbin kayan hada miyagun kwayoyi na nuna cewa wanda ake zargin ba wai karamin dan aiki ko mai rarrabawa kawai ba ne, illa dai mai hada miyagun kwayoyi (‘cook’) ko mai samarwa a cikin wata babbar kungiyar ’yan Nijeriya,” in ji jami’in.
Rahoton ya kara da cewa, bisa bayanan masu bincike, ikon canza sinadarai na masana’antu zuwa heroin da MDMA masu inganci sosai na nuna sauyi daga safarar miyagun kwayoyi kawai zuwa kera su a cikin gida, abin da ya sa wannan kamen ya zama muhimmi ga ’yansanda.
“Emmanuel yana zaune a Indiya ba bisa ka’ida ba. Ta hanyar ɓoye kansa a cunkoson unguwannin zama na Debli, ya samu damar gudanar da aikinsa ba tare da an gano shi ba. An yi rajistar korafi (FIR) a kansa karkashin dokar NDPS Act,” rahoton ya bayyana.
