Jam’iyyar APC ta yi Allah-wadai da wasu mutane da kungiyoyi da ta zarga da yada bayanan da ba su da tushe domin rage darajar nasarorin Shugaban Ƙasa, Bola Ahmed Tinubu.
A cikin wata sanarwa da aka fitar a ranar Asabar a Sokoto, mai magana da yawun shugaban jam’iyyar APC na ƙasa, Malam Yusuf Dingyadi, ya ce ana amfani da kafafen sada zumunta wajen yaɗa “ƙarya da bayanai marasa tushe” da nufin rage kimar ayyukan gwamnati.
Ya bayyana cewa irin waɗannan zantuka ba su da tushe, face nuna son rai da kuma siyasar son zuciya. Dingyadi ya kuma zargi masu adawa da amfani da “zargin ƙarya da farfaganda” domin rage nasarorin gwamnati, musamman a Arewacin Nijeriya.
Ya ce ya kamata ‘yan Nijeriya su yaba da abin da ya kira ci gaban tsaro, ayyukan raya ƙasa da kuma wasu manyan ayyuka da ake ci gaba da gudanarwa.
A cewarsa, amfani da kalaman batanci da yada ƙarya bai dace da ɗabi’ar ‘yan ƙasa masu kishin ƙasa ba.
Ya kuma ce jam’iyyar APC na ci gaba da aiwatar da manufofi da suka haɗa da inganta tattalin arziki, tsaro, noma, ilimi, lafiya, hanyoyi, gidaje da sauran shirye-shiryen tallafi ga al’umma.
A ƙarshe, ya shawarci ‘yan Nijeriya da su yi taka-tsantsan da abin da ya kira yaɗa labaran ƙarya daga masu sukar gwamnati, yana mai cewa ana yin hakan ne don neman goyon bayan siyasa.
Discussion about this post