A cikin watan Ramalana muna koyon sallar dare (Ƙiyamul-Laili), domin mu saba da tsayuwa a gaban Allah a cikin nutsuwar dare. Dare lokaci ne na sirri tsakanin bawa da Ubangijinsa; lokaci ne da hayaniyar duniya ta lafa, zukata suka natsu, kuma hawaye suka fi kusa da zubowa saboda tsoron Allah da bege gare Shi.
Tsayuwa a gaban Allah da dare tana da wani daɗi na musamman. Ba wai tsayuwar jiki kaɗai ba ce, tsayuwar zuciya ce cikin tawali’u da kaskantar da kai a wurin Allah Ta’ala. A cikin dare, mumini yana furta addu’a cikin sirri, yana neman gafara, yana roƙon rahama, yana kuma bayyana buƙatunsa ba tare da riya ko nuna wa mutane ba.
- Darussa Daga Ramadan Na 12: Ƙarfafa Alaƙa Da Alƙur’ani A Ramalana
- Darussa Daga Ramadan Na 11: Sauƙi Da Sassauci A Shari’a
Manzon Allah (SAW) ya bayyana girman ladan wannan ibada a cikin Sahihul Bukhari da Sahihu Muslim inda ya ce: “Duk wanda ya tsaya ya yi sallar dare a watan Ramalana yana mai imani da neman lada, to an gafarta masa abin da ya gabata na zunubansa”
Mai karatu ka lura da sharaɗai biyu kamar haka:
1. Imani; watau a samu cikakkiyar yarda da cewa wannan ibada umarni ce daga Allah.
2. Neman lada; watau bawa ya yin ta domin Allah kaɗai, ba don yabo ko al’ada ba.
Idan aka haɗa waɗannan biyun, sakamakon shi ne gafara. Wace ni’ima ta fi wannan girma? Mutum ya tsaya a dare yana karanta ayoyi, yana ruku’i da sujada, sai Allah Ya shafe masa abin da ya gabata na kuskure.
Ramalana wata ne da ake raya dare da sallar Tarawihi da Tahajjud. Wannan tarbiyya ce ta ruhi. Domin duk wanda ya saba da tsayuwar dare, zuciyarsa tana samun haske, imaninsa yana ƙaruwa, kuma dangantakarsa da Allah tana ƙarfafa.
Tsayuwar dare tana koya mana:
1. Natsuwa da kame kai, domin ka bar gadonka mai daɗi ka tashi kana ganawa da Mahaliccinka.
2. Sadaukarwa; ka ba wa Allah wani ɓangare na lokacinka mafi daraja.
Sirri da ikhlasi – domin yawanci ana yin ta ne a ɓoye.
3. A haƙiƙa, tsayuwar dare alama ce ta soyayya ga Allah. Domin masoyi yana son ya kasance tare da wanda yake so, ko da a cikin dare ne.
Idan muka ɗanɗani zaƙin tsayuwar dare a Ramalana, to ya kamata mu yi ƙoƙarin ci gaba da wani kaso daga cikinta bayan Ramalana, ko da raka’a biyu ne kafin barci ko bayan tashi. Domin abin da ya fi muhimmanci shi ne dawwama, ba yawa kaɗai ba. Ramalana yana koya mana cewa gafara tana kusa da bayi, rahama tana kusa da su, yardar Allah tana kusa da su, abin da ake so shi ne; a miƙa zuciya gare Shi cikin dare.
Allah Ya sa mu kasance cikin masu tsayuwar dare da imani da neman lada, Ya gafarta mana zunubanmu, Ya haskaka zukatanmu da hasken Alƙur’ani, Ya kuma sa mu zama masu kusanci da Shi a duniya da Lahira. Amin.
Discussion about this post