A cikin watan Ramalana muna koyon yadda za mu sami farin ciki da nishaɗi na gaskiya a rayuwarmu. Wannan ba farin cikin shagali ne kawai ba, ko na jin daɗin jiki kaɗai ba; a’a, farin ciki ne na ruhi da zuciya, farin cikin da yake tasowa daga jin kusanci da Allah da godiya a bisa ga tarin ni’imominsa.
Ramalana yana koya mana cewa farin ciki na gaskiya yana cikin sanin ni’ima da kuma godewa Mai bayar da ita. Duk wata ni’ima da Allah Ya yi mana, ta lafiyar jiki, da zaman lafiya, da samun iyali da arziki, da samun ikon bauta masa, to, tana buƙatar a karɓe ta da zuciyar bawa mai godiya ga Mahaliccinsa. Amma daga cikin mafi girman ni’imomi da Allah Ya yi wa bawa, akwai ni’imar shiryarwar da Allah Ya yi masa na zama a cikin addinin Musulunci; ni’imar sanin Allah, da ni’imar bin tafarkin Manzonsa (S.A.W).
Mumini yana bayyana farin cikinsa ta hanyar godewa Allah, ba ta hanyar wuce gona da iri ko mantuwa da Mai ni’ima ba. Farin cikin Musulumi yana da tushe daga imani, yana da iyaka a shari’a, kuma yana da manufa a lahira. Manzon Allah (S.A.W ) ya bayyana cewa farin cikin mai azumi ba ɗaya ba ne, biyu ne. Ya zo a cikin Sahihul Bukhari cewa ya ce: “Mai azumi yana da farin ciki biyu: yana yin farin ciki a lokacin buɗa-baki, kuma idan ya haɗu da Ubangijinsa zai yi farin ciki da azuminsa”
Farin cikin farko, na lokacin buɗa-baki ne, farin ciki ne na halal, na jin cikar biyayya. Ba wai farin cikin cin abinci kaɗai ba ne, sai dai farin cikin kammala ibada da nasarar tsare kai daga abin da Allah Ya hana. Wannan farin ciki yana cike da ma’ana, domin yana haɗa jin daɗin jiki da nutsuwar zuciya.
Farin ciki na biyu kuwa shi ne mafi girma, farin cikin ne na haɗuwa da Allah a Lahira. Wannan shi ne farin cikin sakamakon azumi da zai samu, farin cikin lada, farin cikin ganin cewa wahalar azumi da tsare kai ba ta tafi a banza ba. Wannan farin ciki ba ya ƙarewa, ba ya gushewa, ba ya sauyawa.
Daga nan ne muke fahimtar cewa Musulmi yana rayuwa tsakanin farin ciki biyu:
1. Farin ciki na duniya wanda yake samu a cikin ibada da biyayya ga abin da Allah Ya shar’anta masa na yi ko bari.
2. Farin ciki na Lahira wanda yake jiran sakamakon aikinsa.
Ramalana yana koya mana yadda za mu daidaita farin ciki. Ba ya hana dariya ko walwala, amma yana koyar da mu cewa farin ciki na gaskiya yana cikin tsoron Allah da biyayya gare Shi. Idan zuciya ta sami nutsuwa da Allah, to ko da rayuwa ta kasance mai sauƙi ko mai wahala, mutum yana da haske a zuciyarsa.
Hakika, talauci mafi muni shi ne talaucin zuciya, kuma mafi girman wadata ita ce wadata ta imani. Wanda ya san Allah, ya ɗanɗani zaƙin ibada, ya ji daɗin azumi da salla da addu’a, to ya san cewa farin ciki ba ya cikin tara duniya kaɗai, sai dai cikin kusanci da Ubangiji.
Saboda haka, mu yi amfani da Ramalana wajen gina farin cikin ruhinmu, farin cikin da ba ya gushewa da sauyin lokaci. Mu gode wa Allah a kan ni’imar Musulunci, mu yi farin ciki da ibada, mu kuma yi fatan farin cikin haduwa da Shi a Lahira.
Allah Ya sanya mu cikin bayinsa masu farin ciki a duniya da Lahira, Ya sa mu ɗanɗani zaƙin ibada, Ya kuma ba mu farin cikin haɗuwa da Shi cikin rahama da yardarsa. Amin.
Abu Razina Nuhu Ubale Ibrahim Paki
Discussion about this post