Dorewa da ingantaccen fannin Tashoshin Jiragen Ruwa na Africa ta Gabas da Afirka ta Tsakiya shi ne, babban ginshikin ci gaba wanzuwar tattalin arzikin duniya.
Shugaban Hukumar Kula da Sufurin Tashoshin Jiragen Ruwa na Kasa Dakta Abubakar Dantsoho ya yi wannan furucin.
Dantsoho ya bayyana haka ne, a jihar bayan kammala taron Daraktocin mahukuntan kungiyar kula da Tashoshin Jiragen Ruwa na Africa ta Gabas da Afirka ta Tsakiya wato PMAWCA.
Hukumar NPA ce, ta karbi bakuncin taron wanda ya samu halartar manyan shugabanin Hukumomin kula da Tashoshin Jiragen Ruwa da suka fito daga yankunan.
A lokacin taron, shugabanin sun tattauna kan batutuwa da dama da suka hada da, yadda za a kara inganta ayyukan Tashoshin Jiragen Ruwan da ke a yankunan da samar da kayan aiki na zamani tare da ci gaba da kara karfafa hadaka da hadin kai.
A yayin taron, an kuma tattauna, kan yadda za a kara karfafa tsaro a tekunan da ke a yankunan da kara bunkasa hada-hadar kasuwanci da samar da kayan aiki na zamani a Tashoshin Jiragen Ruwa da ke yankunan.
Ministan kula da bunkasa fannin tattalin arziki na Teku Gboyega Oyetola, shi ma ya halarci taron.
Dantsoho a jawabinsa a wajen taron ya bayyana cewa, Tashoshin Jiragen Ruwa har yanzu, su ne kan gaba wajen samar da damar gudanar da hada hadar-hadar kasuwancida kuma kara habaka fannin tattalin arzikin duniya.
Dantsoho, wanda kuma shi ne shugaban kungiyar ta PMAWCA ya yi nuni da cewa, daukacin shugabanin da kuma masu Ruwa da tsaki a fannin ke a yankunan akwai gudunmawar da da su taka wajen kara saita alkiblar fannin na Sufurin Jiragen Ruwa da ke a yankunan.
Ya kara da cewa, Tashoshin Jiragen Ruwa na ci gaba da Kasancewa hanyoyin da ke bayar da gagarumar gudunmawa wajen hada kasuwanin kasa da kasa, musamman wajen kara bunkasa fannin tattalin arziki.
Ya ci gaba da cewa, hakan na kara haifar da gudanar da shugabanci na gari tare da kuma cimma burin da aka sanya a gaba, a fannin.
Shugaban ya kuma kara jaddada cewa ci gaba da kara tumbatsar tattalin arzikin duniya, hade yake da irin kokarin da Tashoshin Jiragen Ruwa suke yi, musamman a yankuna maso tasowa da ake da bukatar kayan aiki, domin a kara bunkasa gasa a bangaren sufurin Jiragen Ruwa a fadin duniya.
Shugaban ya kuma bayar da tabbacin cewa, Hukumar ta NPA, ba za ta yi kasa a guiwa, wajen ci gaba da samar da kyakyawan yanayi domin a kara ciyar da yankin gaba.
An kuma tattauna kan rahoton ayyukan kwamitin tare da kuma duba ci gaban da aka samu a tsakanin Tashoshin Jiragen Ruwa da ke a yankunan.
