Assalamu alaikum masu karatu, barkanmu da sake haduwa da ku a wannan makon wanda shi ne mako kusan na karshe sai na a Azumin watan Ramadan, a cikin shirin namu mai farin jini da albarka na Girki Adon Mata.
A yau shafin na mu zai zo muku da kayatattun girke-girken Azumi:
Kamar yadda muka sani Azumi lokaci ne na girke girke da dama, kuma lokaci ne daya kamata uwargida ta tanaji abinci iri-iri, ko kuma na ce ta san mai maigida ya fi bukata lokacin buda baki da kuma lokacin Sahur, sannan lokaci ne na kirkirar abinci don burge maigida.
Lokacin buda baki ana so mai Azumi ya fara buda baki da Dabino saboda sunnah ce, da shi aka ce a fara, amma ba wai dole bane, sai kayan marmari (Fruit) kamar Kankana da Lemo, Gwanda, Abarba, da dai sauransu.
Bayan wadannan ba’a so mai Azumi ya fara da ruwan sanyi, sai ki ga wasu sun fara da ruwan sanyi to gaskiya yana kawo kullewar ciki. Ana so mai Azumi ya fara da abu mai dan dumi-dumi kamar shayi ko kunu ko kuma ruwan kanwa saboda kullewar ciki ko kuma kasala da ciwon ciki dOn saboda mutum ya samu damar yin Sallar Tarawi.
Mene ne ruwan kanwa?
Ruwan kanwa wani ruwa ne da ake yi wa mai Azumi, yana da dadi sosai sannan idan mai Azumi ya sha ba ya sa kasala yana warware cikin mutum ko hanjin cikin mutum, idan mai Azumi ya saba da shan ruwan kanwa duk lokacin da bai sha ba ba zai taba jin dadi ba.
Ya ake ruwan kanwa?
Da farko za ki samu Gero sai a surfa shi a cire masa dusa sannan a wanke shi a shanya shi ya sha iska wato ya bushe sosai, sai ki dan soya shi ya yi kamshi, sannan ki zuba masa kayan kamshi citta, kanunfari, masoro, sai ki bayar a nika miki shi ya yi laushi sosai kamar na kunu, ki shanya shi ya bushe, sai ki ajiye shi duk idan za ki dama sai ki diba ki zuba a wani dan bokiti haka sai ki dama shi da dan ruwan kanwa dama kin dora ruwa a wuta kamar dai yadda za ki yi kunu, idan ruwa ya tafasa sai ki kashe shi ki dan barshi ya sha iska saboda kada ya zama Kunu, sai ki zuba sannan ki zuba sukari ki ajiye shi a sha shi da dumi.
Za Mu Ci GABA Mako Mai Zuwa Idan Allah Ya Kai Mu
