Gwamnan Jihar Gombe, Muhammadu Inuwa Yahaya, ya jaddada aniyar gwamnatinsa na karfafa bangaren shari’a a Jihar Gombe ta hanyar gyare-gyare, da inganta ababen more rayuwa, da kyautata jin dadin jami’an shari’a, da nufin tabbatar da samar da adalci cikin gaggawa tare da samun daidaiton bin doka da oda.
Gwamnan ya bayyana haka ne a wajen bikin shekarar shari’a ta 2024/2025 da aka gudanar a Babbar Kotun Jihar Gombe.
- Ana ɗar ɗar Kan Mutuwar Sojoji Bayan Da Tirela Ta Kwace A Legas
- An Dakatar Da Bin Uthman Daga Limancin Masallacin Sahaba, DSS Ta Gayyace Shi
Da yake jawabi ga jami’an shari’a, da sauran manyan baki a wajen taron, Gwamna Yahaya ya yaba wa bangaren na shari’a bisa nasarorin da ya samu a shekarar da ta gabata, musamman wajen yanke hukunce-hukunce daban-daban.
“Idan muka waiwayi baya, yana da kyau mu yaba wa bangaren shari’a bisa dimbin nasarorin da ya samu, musamman wajen gaggauta kammala shari’o’i a dukkan matakai, da suka hada da manyan kotuna, da majistare, da kuma kotunan lardi. Jajircewarku na tabbatar da adalci ya taimaka wajen samar da doka da oda a jiharmu mai albarka,” in ji shi.
Gwamnan ya jaddada bukatar ci gaba da gyare-gyare a bangaren shari’a, inda ya bayyana kokarin gwamnatinsa na magance karancin ma’aikata.
A nata jawabin, babbar mai shari’a ta Jihar Gombe, Mai Shari’a Halima S. Mohammed, ta bayyana cewa an shigar da kararraki guda 616 wadanda suka shafi manya da kananan laifuka da kuma cin zarafi a babbar kotun jihar, daga cikinsu 555 an kammala shari’arsu, inda wadanda suka rage ba su kai 70 ba.
Ta bayyana godiya ga Gwamna Yahaya bisa ba da kwangilar biliyoyin naira na gina babbar sakatariyar kotun da sauran taimako da dama.
Babban Lauyan gwamnatin jihar kuma Kwamishinan Shari’a, Barrister Zubairu Muhammad Umar, ya bayyana cewa gwamnatin Yahaya ta taka rawar gani wajen samun nasarorin da ma’aikatarsa ta samu a yunkurinta na ciyar da sashin shari’a gaba.
