Kafafen yada labaran gwamnatin Iran sun bayyana cewa an sake sanya mashigar ruwa ta Strait of Hormuz karkashin tsauraran matakai, lamarin da ke takaita zirga-zirga, bayan da kasar ta zargi Amurka da kasa cika alkawarin janye takunkumin ruwa da aka kakaba wa tashoshinta. Gidan talabijin na gwamnati, IRIB, ya ce yanzu mashigar ta sake zama karkashin kulawa mai tsauri, inda duk wata zirga-zirga ke bukatar amincewar Iran.
Matakin ya biyo bayan dan takaitaccen bude mashigar da aka yi sakamakon tsagaita wuta na kwanaki 10 tsakanin Isra’ila da Lebanon, wanda ya haifar da fatan daidaita harkokin samar da man fetur a duniya. Sai dai rundunar hadin gwiwar sojin Iran ta bayyana cewa mashigar ta koma yadda take a baya saboda Amurka ta ki janye takunkumin da take kakabawa harkokin ruwa na kasar.
- Mafarauta Sun Kashe Ƴan Bindiga 14, Sun Kuɓutar Da Mutane 3 Da Aka Yi Garkuwa Da Su A Katsina
- Yan Bindiga Sun Kashe Mutane 10 A Taraba, Sun Kwashi Kayan Abinci
- Gwamnatin Kaduna Ta Musanta Zargin Kashe Tiriliyan 2.3 Kan Gangamin APC
- Hukumar Zaɓe Ta Wayar Da Kan Nakasassu Kan Kaɗa Ƙuri’a A Zamfara
- Me Tinubu Zai Yi Wa Arewa Alƙawari A Ƙaddamar Da Yaƙin Neman Zaɓensa A Kaduna?
A cikin wata sanarwa, sojojin Iran sun ce sun amince da barin wasu jiragen dakon mai da na kasuwanci su rika wucewa bisa yarjejeniya, amma Amurka ta ci gaba da abin da suka kira takunkumi. Sun jaddada cewa muddin ba a ba da cikakkiyar ‘yancin zirga-zirga ga jiragen ruwa daga Iran da zuwa Iran ba, mashigar za ta ci gaba da kasancewa karkashin cikakken iko da kulawar sojojin kasar.
Mashigar Hormuz na daya daga cikin muhimman hanyoyin jigilar man fetur a duniya, kuma an riga an ayyana ta a matsayin rufaffiya tun bayan hare-haren sojin Amurka a ranar 28 ga Fabrairu. Duk da dan farfadowar zirga-zirga da aka gani kwanan nan, ana sa ran sabbin matakan za su sake girgiza kasuwannin makamashi, yayin da Shugaban Amurka, Donald Trump, ya jaddada cewa takunkumin da aka kakaba zai ci gaba har sai an cimma cikakkiyar yarjejeniya.
