Ƙungiyar manoma ta ƙasa, reshen Jihar Legas (AFAN), ta yi iƙirarin cewa; kashi talatin cikin ɗari ne kacal na manoman ƙasar ke amfani da kayan aikin noma na zamani.
Ta danganta hakan ne, kan rashin ci gaba da noma amfani gona masu yawa a ɗaukacin faɗin ƙasar.
A cewar ƙungiyar, kimanin kashi 70 na manoman ƙasar, har yanzu suna yin noma ne da kayan gargajiya, wanda a yanzu, kashi 30 kacal ne ke yin amfani da kayan aikin noma na zamani.
Mataimakin shugaban ƙungiyar, Mista Shakin Agbayewa, ya sanar da haka ne a Legas, wanda kuma ya danganta matsalar, kan rashin samun ingattacciyar ƙasar nomar da kuɗaɗe da sauran kayan aikin noma na zamani.
Agbayewa ya koka, kan yadda manoman ƙasar, ba a samar musu da kayan aiki na zamani, kamar taraktocin noma da sauran kayan aikin, na zamani.
A cewarsa, tsadar kuɗin ɗaukar hayar taraktocin noma, wanda hakan ke ci gaba da haifar wa manoman ƙasar, musamman ƙanana da ke karkara, wani ƙarin ƙalubalen ne.
Ya yi nuni da cewa, duk da ƙalubalen da ake ci gaba da fuskanta a fanin, ya jaddada cewa; yin amfani da kayan aikin noma na zamani, na ƙara bunƙasa fannin a ƙasar, wanda kuma zai sanya a samu zuba jari na tsawon lokaci.
“Mai yiwuwa, yin amfani da kayan aikin noman na zamani, musamman na gajeren zango, ya kasance mai tsada, amma a dogon zango za a iya samun riba mai ɗimbin yawa,” a cewar shugaban.
Agbayewa ya ƙara da cewa, manoman da suka rungumi yin noma da kayan aikin na zamani, za su iya yin noma mai ɗimbin yawa tare da rage ɓata lokaci da kuma rage yin asara.
Ya ƙara da cewa, idan aka rungumi yin noma da kayan aikin na zmani, hakan zai ƙara taimakawa, wajen bunƙasa noma da rage ɗaukar hayar Leburori tare da kuma jawo ra’ayin matasan ƙasar, su rungumi fannin na aikin noma.
Agbayewa ya yi kira ga gwamnatin tarayya da na jihohi, da su samar da cibiyoyin bayar da hayar taraktocin noma, sannan kuma a kan farashi mai rahusa, musaman domin manoman ƙasar su riƙa yin haya, idan sun tashi yin noma.
Ya kuma yi kira da a ƙara samar da masana’antu, ƙera kayan aikin noma na zamani a ƙasar, musamman domin samar da kayan gyaransu, wanda hakan zai sanya a rage shigo da kayan zuwa cikin ƙasar, daga ƙetare.
A cewarsa, ƙara faɗaɗa samar da kayan aikin noma na zamani, zai ƙara taimakawa, wajen samar da wadataccen abinci a ƙaar tare da rage shigo da abinci daga ƙetare.
