Kungiyar masu wallafa labarai a kafar yanar Gizo da ke garin Zariya cikin jihar Kaduna,(ZOJF) ta mika ta’aziyyarta ga Malam Yusuf Shu’aibu, Editan jaridar LEADERSHIP Hausa bisa rasuwar mahaifinsa Alhaji Shu’aibu Isma’il.
Alhaji Shu’aibu Isma’il, ya rasu ne a ranar Alhamis, inda tuni aka yi masa zana’iza kamar yadda addinin Musulunci ya tanadar.
Kungiyar a sakonta na ta’aziyar wanda shugabanta ya rattabawa hannu, Ammar Muhammad Rajab ya nuna kaduwarsa da jin labarin rasuwar ya kuma addu’ar samun gafara da rahama ga marigayin uwar ubangijinsa.
Rajab ya ce, “A madadin iyalai na da ‘ya’yan kungiyar, ina mai mika ta’aziyyar mu zuwa ga abokin aiki Malam Yusuf Shu’aibu, bisa rasuwar mahaifinsa Alhaji Shu’aibu Isma’il.”
Kungiyar ta kuma mika ta’aziyyarta zuwa ga ‘yan uwa da abokan arzikin marigayi Alhaji Shu’aibu Isma’il, inda kungiyar ta yi addu’ar Allah ya yafewa marigayin kura-kuransa ya kuma sa Aljannah Firdaus ce makoma amin.
Rajab ya kuma yi addu’ar Allah ya baiwa Edita Malam Yusuf Shu’aibu da kuma daukacin danginsa kan wannnan babban rashin hakuri, da fatan kuma Allah ya ba su ikon jure rashin.
