Ra'ayi Riga

Kwanan nan, an kammala gasar nuna kwarewar sana’o’i ta duniya karo na 48 cikin nasara a birnin Shanghai dake gabashin kasar Sin. A fagen gasar, tawagar Sin ta shiga sahun gaba a duniya a fannoni da dama, tun daga injin da na'ura mai kwakwalwa ke sarrafawa zuwa mutum-mutumin inji na masana’antu, da fasahar walda, gami da aikin gini bisa fasahar zamani. Amma abin da ya fi jawo hankula shi ne, tsarin da Sin take da shi waje raya wadannan fasahohi, da rawar da wannan tsarin ke takawa ga hadin gwiwar kasashe masu tasowa, matakin da zai canza makomar matasan Afirka.  Kwarewar da Sin ta nuna a gasar ta dogara ce kan cikakken tsarin horar da kwararrun fasaha. Ya zuwa yanzu, makarantun sana’o’i na Sin sun wuce 10,000, kana daliban da ke karatu a cikinsu yawansu ya wuce miliyan 33, ban da haka, jimillar kwararrun fasaha a duk kasar ta haura miliyan 200. Daga cikinsu kwararrun fasaha mafi hazaka sun wuce miliyan 72. Ruhin wannan tsari shi ne, kwarewar fasaha ba tana ginuwa a kan “hanyar da za a bi idan babu sauran mafita” ba ce, sai dai a kan turbar samun “mafita mafi kyau”. A Sin, adadin samun aikin yi na daliban da suka kammala makarantun fasahar ya dade yana zarce sama da kashi 95% a ko wace shekara. Sin ta tabbatar da cewa, matukar ana mallakar fasaha, to za a rika samun mafita.  Matasan Afirka ma sun hau wannan hanya.   A wannan gasar, Afirka ta Kudu ta tura masu fafata gasar su 29 don shiga rukunan fasaha 27 na gasar. Kasar Namibia ta tura matasa 17 don fafatawa a ayyuka 16. Kana Uganda ma ta tura masu fafatawa 3 a fagen jinya da walda da dafa abinci. Duk da cewa yawan masu shiga gasar ba shi da yawa, amma kasashen Afirka sun fara bayyana karfinsu a wannan bangare. Sin na son raba damammaki da more fasahohinta da kasashe masu tasowa, musamman kasashen Afirka, don tabbatar da huldar hadin gwiwa mai amfani ga kowa. Hadin gwiwar fasaha na zama sabuwar hanyar hadin gwiwar Sin da Afirka.  Afirka na da dimbin matasa. A cewar Majalisar Dinkin Duniya, sama da kashi 60% na al’ummar yankin kudu da hamadar Sahara na Afirka suna kasa da shekaru 25 da haihuwa ne. Zuwa shekarar 2030, rabin yawan karin ’yan kwadago na duniya da za a samu zai fito ne daga wannan yankin. Amma, kashi 98% na ’yan Afirka da ba su kai shekaru 18 ba, ba su mallaki fasahar STEM, wato kimiyya da fasaha da injiniyanci da lissafi bayan kammala karatunsu ba. Abin da Afirka ke matukar bukata shi ne kwarewar “Fasahohin sana’o’i”. Hakan ya sa hadin gwiwar Sin da Afirka samun wata sabuwar hanya mafi dacewa.  Cibiyar Luban wani mataki ne dake karkashin wannan tsari na hadin gwiwa. Tun daga shekarar 2016, Sin ta kafa cibiyoyin Luban a kasashe da dama a Afirka, inda kasar ta ba da horon sana’o’i kamar kera kayayyaki ta amfani da injin da na'ura mai kwakwalwa ke sarrafawa da aikin lantarki da na walda da sarrafa mutum-mutumin inji da sauransu. A Djibouti, cibiyar Luban ta bude sashen kula da harkokin jirgin kasa, don horar da kwararrun fasaha na cikin kasar domin layin jirgin kasa mai hada Addis Ababa da Djibouti. A Masar, cibiyar Luban ta bude kwasa-kwasan sarrafa inji mai kwakwalwa da mutum-mutumin inji na masana’antu. A Kenya kuwa, cibiyar Luban tana ba da horo a kan fasahohin zamani ta yadda matasan za su zama masu fasaha bayan kammala samun horo.  ’Yan kasar Sin da suka fafata gasar, wadanda suka tsaya kan dandalin lambar yabo a wannan gasa, da kuma matasan Afirka da suke samun horo a cibiyar Luban, dukkansu sun ci gajiyar tsarin horar da kwararrun fasahohin sana’o’i da Sin ta aiwatar. Sin ta dauki shekaru da dama wajen tabbatar da bai wa matasa makoma mai kyau bisa wannan mataki, kuma a yanzu tana raba dabarunta ga kasashen Afirka ta hanyar hadin gwiwar kasashe masu tasowa. Samun lambobin zinari a gasar ya sheda nasarar wannan tsari, amma ma’ana mafi zurfi ita ce a ba mutane da yawa damar mallakar fasahohin.  Fasaha ba ta da iyaka, kuma ba za a bar kowa a baya ba a wannan bangare. Lokacin da masu sana’a na Sin ke samun lambobin a dandalin duniya, matasan Afirka ma za su iya koyon sana’a iri daya, ta hakan za su sami mafitarsu.(Marubuciya: MINA) 

Idan ana son ambatar sunayen kasashen da ke neman tabbatar da ci gaban kasashe daban daban na bai daya a duniya, to, ba za a rasa kasar Sin ba. Shugaban kasar, Xi Jinping, ya jaddada sau da dama cewa, “Ba zai yiwu a samu walwalar duniya da kwanciyar hankali bisa tushen mai kudi na kara samun kudi, yayin da mara kudi ke kara faduwa cikin kangin talauci ba.”  Don daidaita yanayin rashin ci gaba dake damun dimbin kasashe, shugaba Xi Jinping ya gabatar da shawarar tabbatar da ci gaban duniya ta Global Development Initiative (GDI) shekaru 5 da suka gabata. Kana a kwanan baya, shugaban ya aika da sako ga taron manyan jami’ai kan cika shekaru 5 da gabatar da shawarar GDI da ya gudana a hedkwatar Majalisar Dinkin Duniya dake birnin New York na kasar Amurka, inda ya sake nanata cewa, ci gaban tattalin arziki tushe ne na jin dadin rayuwar jama’a.  Shawarar GDI ta kunshi bayanai masu nasaba da fannoni 6, wato dora matukar muhimmanci kan neman ci gaban tattalin arziki, da kokarin inganta rayuwar jama’a, da rage gibin dake tsakanin kasashe masu tasowa da masu sukuni, da amfani da fasahohin zamani don amfanar da al’ummun kasashe daban daban, da sauya salon tattalin arziki zuwa mai kare muhalli, da kokarin aiwatar da nagartattun manufofin da aka tsara.  Cikin shekaru 5 da suka wuce, shawarar GDI ta samu karbuwa sosai a duniya. Zuwa yanzu, kasashe da kungiyoyin kasa da kasa fiye da 130 sun goyi bayan shawarar, kana kasashe kusan 100 sun kulla yarjeniyoyin hadin gwiwa tare da kasar Sin. Kana a bisa tsare-tsare masu alaka da shawarar, an ware kudin da yawansa ya kai fiye da dala biliyan 23, wajen gudanar da ayyukan hadin gwiwa masu amfanar da jama’a fiye da 1800, da horar da mutane masu neman koyon fasahohi fiye da dubu 200, da taimaka wa yunkurin raya tattalin arziki a kasashe fiye da 120.  A kasar Najeriya ma ana iya ganin amfanin shawarar GDI. Wani bayanin da jaridar The Guardian ta kasar Najeriya ta watsa a kwanan baya ya ambata cewa, kasar Sin ta aiwatar da ayyuka da dama masu amfanawa jama’a a Najeriya, misali haka rijiyoyi, da kafa dakunan karatu da ake koyar da fasahohin dijital, da yayata fasahar noman shinkafar da aka tagwaita irinta, da samar da tallafin na’urorin da ake bukata a asibitoci, da dai sauransu. Kana a cikin ayyukan, aikin gina gandun noman laimar kwado ya janyo hankali sosai, har ma ma’aikatar aikin gona ta kasar Najeriya ta bayyana shi a matsayin nasarar da aka samu a fannin kokarin neman samun isasshen abinci.  Kasar Sin ta nuna wa duniya ra’ayinta na tabbatar da ci gaban kasashe daban daban, ta hanyar gabatar da shawarar GDI shekaru 5 da suka wuce, wadda ta yi matukar kokarin aiwatarwa daga bisani. Hakan ya shaida cewa, kasar Sin aminiya ce ga duk wata kasa dake neman raya tattalin arzikinta. (Bello Wang) 

Bisa gayyatar da shugaba Donald Trump na kasar Amurka ya yi masa, shugaban kasar Sin Xi Jinping a yanzu haka yana ziyarar aiki a kasar ta Amurka. Kana a wannan ranar da muke ciki, wato lokacin da Sinawa suke murnar bikin gargajiya na Zhong Qiu (tsakiyar kaka), shugabannin kasashen Sin da Amurka sun yi ganawa a Washington D.C, gami da halartar bikin liyafa tare. Lamarin da ya nuna cikakken sahihanci da aminci da ake samu wajen karfafa zumunta da hulda ta hadin kai tsakanin kasashen biyu.  Sai dai mene ne tasirin haduwar shugabannin Sin da Amurka ga kasashen Afirka? Dangane da wannan tambaya, Sizo Nkala, masanin ilimin al'amuran duniya, dan kasar Afirka ta Kudu, ya ce yadda shugabannin biyu suka gudanar da cudanya kai tsaye zai samar da damar karfafa fahimtar juna da kyautata hulda tsakanin manyan kasashen biyu, abun da ke da matukar muhimmanci ga yunkurin raya tattalin arziki da tabbatar da kwanciyar hankali a duniya. Kana a nasa bangare, Onyango K'Onyango, wani shahararren dan jarida na kasar Kenya, ya ce huldar dake tsakanin Sin da Amurka tana haifar da tasiri kan yanayin tattalin arzikin duniya. Idan kasashen biyu sun iya magance rikici da ci gaba da cudanya da juna, to, dimbin kasashe masu tasowa za su samu damar hadin gwiwa da karin abokan hulda, da raya tattalin arzikinsu yadda suke bukata.  Sakamakon da aka samu wajen ganawar da shugabannin Sin da Amurka suka yi a wannan karo ma ya nuna cewa, hasashen da masu sharhi na kasashen Afirka suka yi ya yi daidai. Saboda a lokacin da shugabannin biyu ke zantawa da juna, shugaba Xi na kasar Sin ya ce, kasashen Sin da Amurka za su iya tabbatar da moriyar juna, da daidaita sabanin ra'ayi, da karfafa amincewa da juna, da tushen zaman lafiya, a kokarin samar da wata hulda mai kyau tsakanin kasashen biyu, wadda za ta amfani jama'ar kasashen da al'ummun duniya. Kana a nasa bangare, shugaba Trump na kasar Amurka ya ce, tabbas ne za a iya kyautata huldar dake tsakanin kasarsa da kasar ta Sin, bisa jagoranci da shi da shugaba Xi suke yi.  Ban da ganawar da sugabannin biyu suka yi, a kwanan nan, tawagogin tattalin arziki da kasuwanci na kasashen biyu sun gudanar da zagaye na takwas na tattaunawar tattalin arziki da cinikayya a Amurka. Bangarorin biyu sun yi shawarwari na gaskiya masu zurfi kan batutuwan tattalin arziki da cinikayya da suka shafe su, kamar aiwatar da yarjejeniyar matsayar da aka cimma a tattaunawar tattalin arziki da cinikayya, da aiwatar da tsare-tsaren rage haraji daidai-wa-daida, da kuma kafa majalisun cinikayya da zuba jari, kana sun cimma wasu matsaya da dama. Kazalika, bangarorin biyu sun kuma tattauna a karon farko game da fasahar kirkirarriyar basira ta AI a karkashin tsarin tattaunawar tattalin arziki da cinikayyar Sin da Amurka.   A zahiri, bisa jagorancin da shugabannin kasashen Sin da Amurka suke yi, cudanya da mu'ammalar kasashen 2 sun nuna wani yanayi mai gamsarwa, wanda yake cike da sahihanci, da niyyar tabbatar da makoma mai haske. Wannan yanayi ya shaida gaskiyar maganar da Elijah Mwangi, shahararren masanin ilimin harkokin siyasa, ya fada dangane da huldar dake tsakanin kasashen Sin da Amurka, inda ya ce, yayin da ake kula da huldar manyan kasashe, ba dole ne a dinga cin moriya da faduwar wani ba, kuma za a iya takara da hadin gwiwa da juna a lokaci guda.  Alal hakika, cudanyar da ake yi tsakanin shugabannin manyan kasashe na Sin da Amurka ta samar da karin tabbaci ga yanayin siyasa da na tattalin arziki na duniya, wadda ke haifar da alfanu ga bangarorin Sin da Amurka, gami da dukkan kasashen duniya gaba daya. (Bello Wang) 

Fasahar kirkirarriyar basira ko AI, a matsayin wata fasaha mai muhimmanci ga...

Kasashe 164 sun jefa kuri’ar nuna amincewa, a yayin da Amurka kadai...

A ranar 26 ga watan Agusta, mummunar zaftarewar kasa ta afka wa yankin arewacin kasar Nepal, wadda har ma ta shafi mahadar kan iyakar Gyirong a jihar Xizang ta kasar Sin, wacce ke iyaka da Nepal, lamarin da ya yi sanadiyyar asarar rayuka da kuma bacewar dimbin mutane.  Hotunan tauraron dan adam sun nuna cewa manyan gine-gine da dama a mahadar kan iyakar Gyirong sun lalace gaba daya sakamakon duwatsu da laka da suka fado daga tsaunukan da ke kusa. A halin yanzu ma'aikatan ceto suna gudanar da ayyukan gano mutanen da suka bace da ceton rai a wurin da ibtila'in ya faru a Gyirong, kuma ana ci gaba da neman mutanen da suka bace ba tare da sararawa ba a wajen yankin da abin ya faru.  Kwanan nan, Malama Chen, mazauniyar birnin Shanghai na kasar Sin, ta rubuta a shafin sada zumunta cewa, ta sami kiran wayar tarho daga ofishin 'yan sanda, inda wani dan sanda ya tabbatar da sunanta da farko, sannan ya tambaye ta game da ziyarar da ta yi a jihar Xizang a kwanan nan, da kuma ko tana da abokan tafiya. A karshe, an tunatar mata cewa, "Wurare da yawa a halin yanzu suna fuskantar ruwan sama mai karfi, don haka ya kamata a magance zuwa wuraren da ka iya fuskantar yanayi mai hadari." A hakika 'yan sanda sun tuntubi Malama Chen don tabbatar da lafiyarta, da kuma neman wasu mutanen da ibtila'in ya shafa ko kuma suka makale.  A karkashin bayanin da Malama Chen ta wallafa a shafin sada zumunta, mutane da yawa sun rubuta cewa, su ma sun samu irin wannan kiran kwanan nan. Wani mai amfani da yanar gizo ko Intanet na jihar Xizang ta kasar Sin ya ce shi da dukkan abokansa da ke zaune a gundumar Gyirong sun sami kiran waya, inda aka yi tambaya ko su da iyalansu ibtila'in ya shafe su, kana ko suna cikin Gyirong yanzu. Sauran masu amfani da yanar gizo da yawa sun yi tsokaci cewa, "Tabbas, sauke nauyin yin wadannan kiraye-kirayen waya na da girma sosai" da "Ma'aikata sun kwantar da hankulansu lokacin da aka amsa kiran waya", da kuma "Ina fatan za a amsa duk wani kiran da aka yi."  Rayuwa a kasar Sin kamar haka take: idan ka fuskanci matsaloli, kar ka damu, domin akwai wani da zai taimake ka. Kana idan hadari ko ibtila'i ya faru, wani kuma zai damu da lafiyarka. Sai dai, a sauran wuraren duniyarmu, yanayin ya bambanta sosai.  A tattaunawar da aka yi da shi, wani masani dan kasar Kanada Jiang Xueqin ya yi tsokaci kan abubuwan da ya gani a Los Angeles na kasar Amurka, a kwanan baya. Yayin da yake halartar wani bikin liyafa a wata unguwa ta masu wadata, ya ga dimibin manyan gidaje wadanda jami'an tsaro masu zaman kansu ke gadi. Sa'an nan a wani yanki na wannan birnin, ya ga tituna cike da mutanen da ba su da matsuguni, wadanda da yawa daga cikinsu suna ta shan muggan kwayoyi. Jiang Xueqin ya ce, "Wannan abin ban mamaki ne kwarai da gaske." Ya kara da cewa, "A daya daga cikin kasashe mafi arziki a duniya, wato Amurka, an bar miliyoyin mutane a baya, ba tare da kulawa da su ko kadan ba." Ya ce, idan an kwatanta da yiwuwar barkewar yaki, ya fi damuwa kan rashin daidaiton zamantakewar al'umma, da lalacewar yanayin cikin gidan wata kasa da ke faruwa sakamakon ra'ayin mutanen yammacin duniya na matukar son kai. A cewarsa, wannan ita ce babbar barazana ga bil'adama.  Mutanen kasashen yamma suna goyon bayan ra'ayin barin daidaikun mutane kowa ya tabbatar da kome da kansa, da jaddada muhimmancin 'yancin mutum, kuma suna kallon kasashensu a matsayin "duniya mai 'yanci", sai dai tunaninsu ya kan haifar da matsaloli, misali kadaici da karancin damar samun taimako, da rashin daidaito cikin al'umma, da dora matukar muhimmanci kan karuwar dukiyar wasu mutane maimakon kokarin amfanar da jama'a.   Hakika a ganina, ci gaban al'umma ba dole ne ya zama mai bin turbar kasashen yamma ba. Watakila zabi mafi kyau shi ne salo na kasar Sin, wanda ya shafi fayyace ma'anar kalmar "ci gaban al'umma" bisa fahimtar kai, da kokarin gina wata al'umma mai darajanta adalci, inda kowa ke samun kulawa yadda ake bukata. (Bello Wang) 

Samun Rarar Kudin Ciniki Ba "Laifi" Ba Ne, Hadin Gwiwa Da Cin...

'Yan siyasar kasashen yamma kan karawa batun "rarar kayan da Sin ta...

Kwanan nan, na karanta wasu bayanai da suka shafi yadda kasar Najeriya...

Sin ta fara aiwatar da manufar soke harajin fito gaba daya ga...