Hukumar Kula da Inshorar Lafiya ta Jihar Kano State, ta bayyana shirin saka aƙalla masu fama da cutar tarin fuka 6,000 cikin tsarin kula da marasa ƙarfi domin faɗaɗa damar samun magani da rage yaɗuwar cutar a jihar.
Babbar sakatariyar hukumar, Rahila Mukhtar, ce ta bayyana hakan yayin wata ziyarar wayar da kai da ƙungiyar Kano TB Network tare da Society for Child Support and Economic Empowerment suka kai, ƙarƙashin jagorancin mai gudanarwarsu, Sunusi Hashim.
Rahila ta ce hukumar ta riga ta haɗa masu ɗauke da cutar HIV cikin tsarin inshorar lafiyarta, kuma yanzu za ta miƙa irin wannan tallafi ga masu fama da tarin fuka a ƙarƙashin shirin kula da marasa ƙarfi.
Ta bayyana tarin fuka a matsayin ɗaya daga cikin manyan matsalolin lafiya da ke buƙatar gaggawar haɗin gwuiwa tsakanin masu ruwa da tsaki domin inganta kula da marasa lafiya da dakile yaɗuwar cutar.
A cewarta, haɗa masu fama da tarin fuka cikin tsarin inshorar lafiya zai taimaka wajen rage matsin kuɗin jinya tare da ƙara damar samun gwaji, magani da sauran muhimman ayyukan lafiya. Rahotannin lafiya na shekarar 2026 sun nuna cewa jihar Kano na daga cikin jihohin da suka fi fama da cutar tarin fuka a Nijeriya, inda aka ƙiyasta samun mutum 33,961 da suka kamu da cutar a cikin shekarar.
