Mazauna birnin Bauchi su na ci gaba da kokawa kan tsadar farashin kuɗin sufuri na Achaba da na Keke Napep, duk da raguwar farashin kuɗin man fetur da aka samu kwanan nan.
Da dama daga cikin fasinjoji sun ce tsadar kuɗin sufuri da ke ci gaba da yin tsada ya ƙara tsananta wahalar rayuwa, musamman ga masu ƙaramin ƙarfi da ke dogaro da Achava da Keke Napep wajen zirga-zirgar yau da kullum a cikin birnin.
- Ƴansanda Sun Cafke Wani Mahaifi Bisa Zargin Yi Wa Ƴarsa Mai Shekara 8 Fyaɗe A Bauchi
- Yadda Ɗalibai Ke Ɗaukar Darasi A Ƙasa, Cikin Rana Da Ƙarƙashin Bishiyoyi A Bauchi
A zagayen da Wakilinmu ya yi zuwa gidajen mai a ranar Talata ya tabbatar mafi yawan gidajen mai a Bauchi suna sayar da litar man fetur kan Naira N830, wanda ya ragu sosai idan aka kwatanta da tsohon farashin da ake sayar da litar mai da ya haura Naira N1,100.
Duk da wannan ragin, mazauna sun koka cewa kuɗin sufuri bai sauƙa ba. A cewar wasu fasinjoji, tafiyoyi da a baya ke kai N200 yanzu suna kai N400 zuwa N500, lamarin da ke ƙara janyo wahalar ga mutane.
Sun bayyana halin a matsayin rashin adalci kuma ba tare da hujja ba, suna tambayar dalilin da ya sa masu sufuri suka ƙi rage kuɗin Achava daidai da raguwar farashin mai.
Wani ma’aikacin gwamnati, Musa Abdullahi, ya ce ƙarin kuɗin sufuri ya tilasta masa rage zirga-zirgarsa tare da yin ɗan tafiya domin rage kashe kuɗin zirga-zirga.
Haka nan, wani ɗan kasuwa a Kasuwar Muda Lawal, Mustapha Mohammed, ya ce sufuri yanzu yana cin kaso mai yawa na ribar da yake samu a kullum, lamarin da ya rage masa tara riba mai tsoka.
Wani mazaunin jihar, Adamu Ashiru da ya zanta da Wakilinmu, ya ce a gaskiya wannan abun takaice ne, “Lokacin da ake sayar da litar man fetur a da baya kafin janye tallafin mai da ya sanya farashin ya tashi wurin da muke zuwa a Naira 200 ya dawo Naira 400 ko 500. To, abun takaici yanzu mai ya sauƙo daga sama da Naira 1,100 zuwa N830 amma masu abun hawa ba su sauƙo da farashin ba.”
Mazauna suna kira ga gwamnatin jihar Bauchi da ta shigo cikin lamarin ta hanyar samar da ƙarin motocin sufuri na jama’a domin sauƙaƙa matsalolin sufuri da kuma daidaita kuɗin tafiya a cikin birnin.
Wata ɗaliba a kwalejin kimiyya da fasaha mallakin gwamnatin tarayya da ke Bauchi, Khadija Ibrahim, ta ce shigar da motocin gwamnati masu arha zai rage dogaron fasinjoji ga ‘yan Achaba masu zaman kansu tare da kawo sauƙi mai matuƙar muhimmanci.
A halin da ake ciki, wani ma’aikacin gidan mai na Matriɗ Energy Limited da ke kan titin Dass Road, Bauchi, Saleem Usman, ya shaida ana cewa farashin fetur ya sauƙa a duk faɗin jihar.
Ya ce: “Hakika farashin fetur ya sauƙa a Bauchi. Yawancin gidajen mai suna sayarwa a kan N830 kowace lita. A baya, ya haura N1,000, inda wasu ke sayarwa sama da N1,100.”
Ya ƙara da cewa gidajen mai da ke da alaƙa da Dangote, kamar MRS filling stations, suna sayar da fetur a kan N739 kowace lita.
Ƙoƙarin samun martani daga ƙungiyar masu Achaba da Keke Napep bai samu ba har zuwa lokacin kammala wannan rahoton.
