Babban Daraktan Hukumar Tashoshin Jiragen Ruwa ta Nijeriya (NPA), Dr Abubakar Dantsoho, ya bukaci ‘yan kasuwa da masu zuba jari da su yi amfani da sabbin hanyoyin fitar da kaya zuwa kasashen waje domin sake daidaita matsayin Nijeriya a idon duniya.
Yayin bikin Ranar Musamman ta NPA ta 2026 a ranar Asabar, Dantsoho ya ce hukumar ta Bullo da hanyoyin saukaka matakai domin kawar da cikas na dogon lokaci da ke hana masu fitar da kaya shiga kasuwannin waje.
- Hukumar RUWASSA Ta Kudiri Aniyar Samar Da Ruwa A Fadin Jihar Katsina
- Gwamna Bago Ya Gargadi ‘Yan APC Masu Yi Wa Jam’iyyar Zagon Kasa
Ya bayyana cewa sauye-sauyen na da nufin bunkasa fitar da kayayyakin da ba na man fetur ba, inganta daidaiton cinikayyar Nijeriya, da kuma hada masu samar da kayayyaki daga yankunan karkara cikin harkar samar da kayayyaki ta duniya.
Dantsoho ya bayyana Cibiyoyin Sarrafa Fitar da Kaya a matsayin muhimmin sauyi, yana mai cewa su ne cibiyoyi a wuri guda da ke hadawa da tattarawa, gami da lodawa cikin kwantena, shiryawa, samar da takardu, tantancewa da tsara jadawalin na’ura.
“An kirkiri wadannan cibiyoyi ne domin saukaka tsarin fitar da kaya wanda a baya yake da wahala sosai.
“Muna gayyatar ‘yan kasuwa da masu zuba jari da su binciki wadannan tsare-tsaren saukaka fitar da kaya da kuma sauran damammaki da ke akwai a NPA.”
Ya ce an hada EPTs da ayyukan tashoshin jiragen ruwa ta hanyar tsarin kira domin tabbatar da saurin fitar da kaya da rage jinkiri.
“Yanzu masu fitar da kaya za su iya kammala takardu, shiryawa da daidaita jigilar kaya cikin sauki da inganci,” in ji Dantsoho.
Ya kara da cewa NPA na aiki tare da Majailisar Ci Gaban Fitar Da Kayayyaki ta Nijeriya (NEPC) domin karfafa alakar tashoshi da yankunan karkara.
A cewarsa, hadin gwiwar zai hada EPTs da Dakunan Ajiye Kaya na Cikin Gida domin samar da tsari mai kyau ga kananan da matsakaitan masana’antu (SMEs) su shiga kasuwannin duniya.
Dantsoho ya jaddada cewa cinikayya ita ce hanya mafi dacewa ga Nijeriya wajen cimma burin tattalin arzikinta, musamman a kokarin da ake yi na rage dogaro da man fetur.
