Rikicin siyasa tsakanin Gwamnan Jihar Katsina, Malam Dikko Umar Radda, da Alhaji Kabir Ibrahim Masari, mai bai wa Shugaban Ƙasa shawara kan harkokin siyasa, na ci gaba da haifar da cece-kuce a jihar, yayin da wasu manyan jami’an gwamnati suka fara murabus daga muƙamansu.
Wannan lamari ya haifar da tambayoyi daga wasu mazauna jihar kan abin da ke faruwa a gwamnatin Radda, musamman ganin cewa gwamnati ta sha bayyana cewa tana mai da hankali kan aiwatar da ayyukan da ta yi alƙawari, maimakon ɗaukar sabbin alƙawura lokacin kamfen.
Sai dai a baya-bayan nan, wasu jami’an da aka ɗauka aiki a gwamnatin sun fara ajiye muƙamansu.
Wasu daga cikinsu sun bayyana komawarsu ɓangaren Ibrahim Masari, yayin da wasu ba su bayyana dalilinsu na yin murabus ba.
Rikicin Radda Da Masari
Rikicin tsakanin ɓangarorin biyu ya ƙara bayyana bayan zuwan Ibrahim Masari Katsina domin gudanar da harkokin siyasa da neman goyon bayan Shugaba Bola Ahmed Tinubu.
Masari da magoya bayansa na ci gaba da neman goyon bayan Tinubu a jihar, yayin da a gefe guda gwamnatin Radda ke gudanar da nata harkokin siyasa na jam’iyyar APC.
Wannan yanayi ya sa wasu ke ganin cewa akwai rashin jituwa tsakanin ɓangarorin biyu, duk da cewa dukkansu suna cikin jam’iyyar APC.
Ana kuma zargin cewa magoya bayan ɓangarorin biyu na ƙara ruruta wutar rikicin, lamarin da ke sa wasu ke shakkar yiwuwar sasanta ɓangarorin kafin babban zaɓen 2027.
Rikici A Kan Fastocin Tinubu
Ɗaya daga cikin abubuwan da suka ƙara jawo hankali shi ne kama wani matashin ɗan siyasa, Aminu Sanda, wanda aka fi sani da Nasta, wanda ake danganta shi da ɓangaren Gwamna Radda.
An kama Nasta bisa zargin cire fastocin Shugaba Bola Tinubu.
Rahotanni sun kuma danganta kama shi da umarnin da ake zargin Ibrahim Masari ya bayar.
Daga baya an gurfanar da shi a gaban wata kotu a Abuja, inda aka tuhume shi da lalata fastocin Shugaban Ƙasa da kuma wani zargin da ya shafi kuɗi.
Daga bisani an bayar da belinsa.
Batun ya kuma kai ga gayyatar jami’an tsaron gidan Gwamnan Katsina, ciki har da ADC da CSO, zuwa shalkwatar ‘yansanda domin amsa tambayoyi kan lamarin.
Tun daga wannan lokacin, dangantakar siyasa tsakanin ɓangarorin biyu ta ƙara yin tsami.
A tarukan siyasa da kowanne ɓangare ke gudanarwa, ana ganin ƙarancin hulɗa ko halartar jami’an ɓangaren ɗayan.
Murabus Ɗin Jami’an Gwamnati
Ana cikin wannan yanayi ne aka fara ganin wasu jami’an gwamnatin Radda suna ajiye muƙamansu.
Tsohuwar Kwamishiniyar Harkokin Mata ta jihar, Hajiya Hadiza Yar’adua, ta yi murabus bayan an sauya matsayinta daga kwamishiniya zuwa mai ba da shawara.
Ana alaƙanta ta da ɓangaren Ibrahim Masari.
Bayan haka, Abubakar Soja Tsanni, mai ba Gwamna shawara kan bunƙasa rayuwar al’umma, shi ma ya ajiye muƙaminsa tare da bayyana goyon bayansa ga tafiyar Ibrahim Masari.
Haka kuma, tsohon Sakataren Jam’iyyar APC na jihar a zamanin tsohon Gwamna Aminu Bello Masari, Barista Sulaiman Namadi, ya ajiye muƙaminsa na shugaban hukumar kula da zaizayar ƙasa ta jihar.
Daga baya, Shugaban Hukumar Jin Daɗin Alhazai ta jihar, Alhaji Kabir Bature, wanda ake ganin yana da kusancin Gwamna Radda, shi ma ya yi murabus.
A ɓangaren mata kuma, Hajiya Fadila Sani Dalhatu ta ajiye muƙaminta na babbar mai taimaka wa gwamna kan ayyukan raya ƙasa, sa ido da tantancewa.
Haka kuma babban kwamandan Hisbah na jihar, Dakta Aminu Usman (Abu Ammar), da mataimakinsa, Alhaji Muhammad Shitu Maslaha duk sun yi murabus, hakan ya ƙara tayar da hankalin masu bibiyar siyasar jihar.
Wasu Sun Fice Daga Jam’iyyar APC
Yayin da wasu daga cikin waɗanda suka ajiye muƙamansu suka bayyana goyon bayansu ga tsagin Ibrahim Masari, wasu kuma sun yi shiru kan makomar siyasarsu.
Akwai kuma wasu ‘yan siyasa da suka fice daga jam’iyyar APC zuwa wasu jam’iyyun siyasa, ciki har da PDP da ADC.
Ɗan majalisar dokokin jihar mai wakiltar Kankia, Hon. Salisu Rimaye, ya bayyana cewa wasu daga cikin ‘yan takarar da suka rasa kujeru a zaɓen fidda gwani sun yi tunanin barin APC, yayin da wasu suka yanke shawarar ci gaba da zama a jam’iyyar.
Yayin da zaɓen 2027 ke ƙara gabatowa, rikicin siyasa a jihar Katsina da yadda yake shafar gwamnatin jihar da jam’iyyar APC na ci gaba da zama lamari mai jan hankali, musamman kan ko ɓangarorin Radda da Masari za su iya sasanta tsakaninsu ko kuma rikicin zai ci gaba da yin tasiri a siyasar jihar.
