Duk zantukan da ke futa daga bakin Mai girma Gwamnan Jihar Rivers Nelson Wike sambatu ne Kawai na Zafin Kaye da yasha a Zaɓen Fidda Gwani da aka gudanar a baya. Honarabul Zaharaddeen Babba Mazoji Tsohon Dan takarar kujerar Sanata a Shekara ta 2019 Kuma guda cikin Dattijan Jam’iyyar PDP a Jihar Katsina ne ya bayyana haka ga manema Labarai a Abuja.
Honarabul Zaharaddeen Babba Mazoji yace “na saurari tattaunawar da akayi dashi inda ya bayyana wasu maganganu da basu kamata ace sun fito daga bakin mutun irin Wike ba, Wanda mutum ne mai qima a wajena kasancewar ya bayar da gagarumar gudunmawa a baya. Abin akwai mamaki Wanda tun kafin lokacin Zaɓen fidda Gwani lokacin wani taro da akayi a Legas mun bayar da shawara inda akayi watsi da bukatar nuna wani dan Takara daga wata shiyya wanda hakan baya cikin kudin tsarin mulkin Jam’iyyar PDP.
“Kuma Wike mantawa ya yi sune sukayi uwa kuma sukayi makarbiya wajen tabbatar da fitowar Shugaban Jam’iyyar PDP daga arewa domin a zatonsu shikenan sai Shugaban Kasa ya fito daga kudu? Sun manta wanca kudiri ko tattaunawa da akayi a Jihar Legas cewa Kujerar Shugaban Kasa ‘yace a ruwa ta mai rabo, an aminta duk Mai sha’awa ya fito ya tallata hajarsa. Kuma ai shi Wike dashi akayi takarar fidda Gwani na Kujerar Shugaban Kasa na Jam’iyyar PDP, mai girma Alhaji Atiku Abubakar ya rangada shi da Kasa. Sannan ko a zantawar tasa ya tabbatar da cewa mulki Allah ke bada shi ga wanda yaso, shike nan Allah ya baiwa Atiku sai ciwon hassada ya bayyana? Inji Mazoji
Da aka tambayeshi kan matsayar Wike da ‘yan barandarsa kan Ficewa daga tawagar yakin neman zaɓen Atiku, Mazoji ya bayyana cewa wannan Shure shure ne da baya hana mutuwa, abinda Wike ya kamata ya fahimta Kashi 90% na masu zugashi wasu mutane ne da ko a akwatinsu ba zasu iya katabus ba, wasu kuma tsoffin Gwamnoni ne data kare masu suke dan lasar abin sawa a baka daga Gwmna Wike, Wanda Ina tabbatarwa da Wike cewa sauran ‘yan Kwanaki wa’adin mulkinsa ya kare duk guduwa zasu yi su barshi. Yanzu haka wani adadi mai yawa daga cikin masu rajin goya masa baya (Wike) duk sun tabbatar da Atiku suke, Idan Kuma sun koma kusa dashi su nuna suna tare dashi.
Da aka tambayeshi baya ganin cikin jawaban Wike ya nuna yana cikin Jam’iyyar ta PDP kuma zai ci gaba da yakarta? Babba Mazoji cewa ya yi, mu Wike ba wata barazana bace ga takarar Wazirin Adamawa, domin duniya ta fahimci Wike da ‘yan korensa Arewa ce basa kauna, kuma ya kamata na tunawa Wike idan mantawa ya yi, ya manta Shekara nawa Obasanjo ya yi akan karagar mulki, Shekara Nawa Goodluck ya yi Kuma Shekara nawa Dattijon arziki Alhaji Musa ‘Yar Adua ya yi akan mulki, duka kusan Shekara Goma Sha Huɗu’ ‘yan kudu suka yi suna mulkar mu, kuma sai yanzu da Allah ya kawo lokacin Atiku hassada zata bayyana?
Babba Mazoji ya tabbatarwa da masu irin wancan ciwon hassada cewa suyi hakuri mulki Allah ke ba dashi ga wanda yaso, yanzu kuma alamu sun bayyana Wazirin Adamawa Alhaji Atiku Abubakar shi ne Shugaban kasarmu na gobe da yardar Allah. Jama’ar Nijeriya Mun sha azaba a hannun Jam’iyyar APC, ga talauci, rashin tsaro, Yajin aikin Malaman Jami’a, Sayar da kadarorin Gwamnati, Jama’a duk sun zama mahaukata saboda tsananin yunwa, wannan tasa Jama’ar Nijeriya yanzu sun gamsu Jam’iyyar PDP itace Jirgin fiton Al’umma.
A Karshe Babba Mazoji ya yiwa Jama’ar Kasarnan busharar kyawawan manufofin Atiku Abubakar, wanda zarar Allah ya bashi wannan dama aiwatarwa kawai za’a fara, ba kamar Gwamnatin APC ba data hau mulki babu wasu kwararan munufofin ciyar da Kasa gaba. Muna sanar da Jama’a sauran kwanki kadan ya rage a kaddamar da yakin neman zabe, wanda kowa zaiga irin fitar da zamuyi domin gaisawa da al’ummar Kasa.
