Fargaba da rashin tabbas sun dabaibaye al’ummar Jihar Osun gabanin gudanar da zaɓen gwamnan jihar na yau Asabar, biyo bayan jerin tashe-tashen hankula. Rikicin ya fi kamari a garin Esa-Oke da ke Ƙaramar Hukumar Obokun, inda rahotanni suka nuna asarar rayuka ciki har da ɗan uwan wani jigon siyasar jihar.
Haka zalika, an bayyana wani faifan bidiyo da ke zargin Sanata Francis Fadahunsi da umartar magoya bayansa su far wa mambobin jam’iyyar Accord, wanda hakan ya jawo yawaitar harbe-harbe da lalata dukiyoyin al’umma tsakanin ɓangarorin jam’iyyun.
Duk dai a makwannin zaɓen kuma, al’amura sun ƙara ɗaukar sabon salo bayan da Hukumar EFCC ta kulle asusun Gwamnatin Jihar Osun kwanaki goma kacal gabanin zaɓen, bisa zargin karkatar da kuɗaɗen tallafin muhalli har naira biliyan 11.
Gwamnatin jihar da wasu jigogin siyasa irin su Atiku Abubakar sun yi suka tare da yin Allah-wadai da wannan mataki, a daidai lokacin da ake fuskantar gagarumar fafatawa tsakanin manyan ƴan takara uku da suka haɗa da Adeleke na jam’iyyar Accord, Bola Oyebamiji na APC, da kuma Najeem Salam na jam’iyyar ADC.
Domin samun sahihan bayanai da kuma tsare-tsaren gudanar da wannan zaɓe, ana shawartar al’umma da masu karatu da su ziyarci shafin [Hukumar Zaɓe Mai Zaman Kanta ta Ƙasa INEC
