Kamar yadda binciken masana kiwon lafiya ya tabbatar, yawan cin Karas na matukar taimakawa ta fuskar inganta lafiyar Dan Adam daga bangarori daban-daban da suka hada da:
1- Cin Karas na taimakawa wajen kara karfi da kuma ingancin ido a lokaci guda. Kamar yadda aka sani ne, rashin samun wadataccen sinadarin ‘bitamin A’, na iya haifar da matsalar rashin gani; musamman idan dare ya yi.
- Abubuwa Uku Da Za A Yi Farashin Kaya Ya Sauka A Nijeriya – Dakta Saleh
- Sabon Shirin Auren Zawarawan Kano A Sikeli
2- Shan kofi guda na Karas din da aka markada ko kuma cin babba a hakansa, na bayar da cikakken sinadarin ‘bitamin A’ dari bisa. Kazalika, yana taimakawa wajen kare kamuwa daga cutar Kansa da kuma Kyanda.
3- Haka nan, sinadarin ‘bitamin A’ da ake samu sakamakon cin wannan Karas, ba wai kadai yana taimakawa ba ne wajen kara karfin gani, a’a yana taimakawa lafiyar idon ne baki-daya.
4- Cin Karas na taimakawa wajen daidaita sigan jikin Dan Adam, duk kuwa da cewa; wasu na kallon Karas din a matsayin guda daga cikin wadanda ke dauke da siga, musamman idan aka kwatanta shi da sauran kayan marmari.
5- Haka zalika, Karas na taimakawa wajen rage kiba; dalili kuwa kashi 88 cikin 100 nasa, ruwa ne kamar yadda binciken masana kiwon lafiya ya tabbatar.
6- Amfani da Karas, na taimakawa wajen hadarin kamuwa da cutar Kansa iri daban-daban, wadanda suka hada da Kansar hunhu, sankarar mama da sauran makamantansu.
7- Karas na taimakawa wajen daidai jinin Dan Adam (Blood Pressure Regulation) ya yi daidai wadaida, don haka; yana da matukar amfani, musamman ga wadanda suka ci abinci mai dauke da gishiri da yawa; su ci Karas sosai.
8- Yawan cin Karas, na rage hadarin ciwon zuciya; a wata makala da aka buga a mujallar abinci ta shekarar 2019 ta bayyana cewa, amfani da Karas na taimakawa wajen rage hadarin kamuwa da cutar zuciya a tsakanin al’umma.
9- Karas na matukar taimaka wa garkuwar jikinmu, kamar yadda makalar da aka buga a mujallar abinci ta shekarar 2019 ta tabbatar, domin kuwa yana dauke da sinadarin bitamin C da na A a cikinsa. Bitamin C, wanda Karas ke dauke da shi, shi ne yake taimakawa wajen kara kare garkuwar lafiyar jikin Dan Adam.
10- Bugu da kari, amfani da Karas na taimakawa wajen kara lafiyar kwakwalwa tare da washewarta da kuma yin aiki yadda ya kamata. A wani bincike da aka yi aka kuma wallafa a shekarar 2021, an bayyana yadda amfani da Karas ke taimaka wa lafiyar kwakwalwa, musamman ga manya magidanta.
