An kama ƴan Nijeriya huɗu a ƙasar Indiya bisa zargin aikata damfara da satar shaidar mutane ta Intanet.
Jaridar PUNCH Metro ta rawaito daga rahotannin Times of India cewa an kama mutum uku da ake kira Chinedu, Sunday da Jules a hannun ƴansandan Gurugram saboda zargin damfarar mutane ta hanyar amfani da sunan mata a kafofin sada zumunta domin yaudarar waɗanda abin ya shafa.
An kama mutum na huɗu mai shekaru 49 da ake kira Uchenwa daga hannun rundunar musamman ta Uttar Pradesh a ranar Juma’a.
Rahotanni sun ce ƴansanda sun ƙwato wayoyin hannu 19, kwamfuta guda ɗaya, da katunan SIM 18 na Indiya da na ƙasashen waje daga hannun Chinedu, Sunday da Jules.
Ƴansanda sun ce bincike ya fara ne bayan wani mutum ya kai ƙara a ranar 25 ga Afrilu na shekarar da ta gabata, yana cewa an damfare shi da wata mace da ya haɗu da ita a Instagram.
“Wannan ƴar ta gaya masa cewa ta iso Indiya kuma tana buƙatar kuɗi Rs 69,900 a matsayin kuɗin rajista domin canja masa cek zuwa kuɗin Indiya a filin jirgin saman Mumbai,” in ji ƴansanda.
Bayan ya tura kuɗin, wanda aka damfarar ya gane cewa an yaudare shi.
A yayin bincike, ƴansanda sun bi sawun masu laifin har suka kama su a Noida da daddare a ranar Alhamis.
Rahotanni sun ce Sunday ya shiga Indiya ba bisa ƙa’ida ba ta Bangladesh a 2022, yayin da Chinedu da Jules suka shiga ƙasar da takardun karatu a 2018 da 2017.
“Waɗanda ake zargin suna tattaunawa da mutane a Indiya suna nuna kansu a matsayin mata a kafofin sada zumunta, suna amfani da amincewa da suka samu wajen damfara,” in ji wani jami’in ƴansanda.
A wani rahoto daban, an bayyana cewa Uchenwa yana ƙirƙirar bayanan bogi a kafofin sada zumunta, yana amfani da sunayen mutane daga Amurka da Birtaniya don yaudarar maza da mata a Indiya.
Rahotanni sun ce an riƙa yaudarar waɗanda abin ya shafa da alƙawarin aiko musu da kyaututtuka masu tsada, kuɗin waje da kayan alfarma zuwa Indiya.
Wani wanda abin ya shafa ya ce ya samu buƙatar abota a Facebook daga wata “Doris Williams” daga Ingila a watan Agusta 2025.
Bayan ya amince, an ce ta yi masa alƙawarin kawo kusan Rs 3 crore zuwa Indiya.
Daga baya aka ce wasu da ke nuna kansu a matsayin jami’an kwastam sun kira shi, suna cewa an tsare matar a filin jirgin saman Delhi saboda yawan kuɗin da take ɗauke da shi.
An tilasta masa biyan kuɗin “kwastam” har Rs 61,500 ta hanyar UPI.
Daga bisani kuma aka ci gaba da neman ƙarin kuɗi, har ya kai ga tura kusan Rs 40 lakh zuwa asusun daban-daban, sannan aka sake yaudararsa ya tura ƙarin Rs 28 lakh.
Binciken ya nuna cewa wanda ake zargi ya amsa cewa ya fara zuwa Indiya ne domin kasuwancin kayan sawa a shekarar 2010, amma daga baya ya koma harkar damfara ta intanet saboda matsalar kuɗi.
Waɗannan kama-kame na ƙara yawan rahotannin ƴan Nijeriya da ake dangantawa da laifuka a ƙasashen waje, ciki har da damfara, sata da safarar miyagun ƙwayoyi.
