Aƙalla mutane 20 da suka haɗa da masu kiwon kifi da masu yankan itace sun mutu, yayin da wasu da dama suka jikkata sakamakon fashewar bam da ake zargin ‘yan Boko Haram ne suka dasa a wajen ƙaramar hukumar Gwoza a jihar Borno.
Rahotanni sun nuna cewa lamarin ya faru ne da misalin ƙarfe 11 na safe ranar Alhamis a ƙauyen Hambagda da aka sake zaunar da jama’a a ciki.
Wata majiya daga rundunar Civilian JTF ta ce wasu daga cikin waɗanda suka mutu masu yankan itace ne da suka je neman abinci domin tallafa wa iyalansu. Ta ƙara da cewa bayan fashewar bam ɗin, maharan sun ci gaba da harbi kan fararen hula da ba su da makami.
Wata majiya ta daban ta ce galibin waɗanda aka kai wa harin manoma ne da kuma mutanen da ke tattara itace a daji domin shirya noma kafin zuwan damina. Hakan ya nuna yadda hare-haren ke ƙara tsananta a yankunan karkara.
Rahotanni sun tabbatar da gano gawarwaki 18 zuwa yanzu, yayin da ake fargabar adadin zai ƙaru saboda akwai wasu da har yanzu ba a gano su ba. Mazauna yankin sun bayyana damuwa kan ci gaba da hare-haren, musamman a daidai lokacin da manoma ke shirin fara noman damina.
