Ɗan takarar shugaban ƙasa na jam’iyyar Labour Party (LP) a zaɓen 2023, Peter Obi, ya ce Shugaba Bola Ahmed Tinubu ya komar da dimokuraɗiyya baya, inda ya bayyana cewa tsarin mulki ya samu koma baya tun lokacin da ya hau mulki shekaru biyu da suka wuce.
Obi ya bayyana hakan ne a cikin wata sanarwa da ta fito a ranar Alhamis mai taken ‘Democracy in Decline: Reflecting on Two Years of Tinubu’s Governance’. Tsohon gwamnan jihar Anambra ya ce bayan nazari mai zurfi a kan shekaru biyu na mulkin Tinubu, babu shakka cewa gwamnatin ta kasa gudanar da ayyukanta yadda ya kamata.
- Kashinku Ya Bushe: Sojoji Sun Lashi Takobin Kawo Ƙarshen ‘Yan Ta’adda A Zamfara Da Katsina
- Cikakken Jerin Sunaye: Tinubu Ya Karrama ‘Yan Nijeriya 102 Don Bukin Ranar Dimokuradiyya Ta 2025
Ya kuma koka cewa gwamnatin APC ƙarƙashin jagorancin Tinubu ta kasa cimma burin cigaba a fannonin tattalin arziki, da tsaro, da yaki da cin hanci da rashawa, da kuma harkokin siyasa. Ya buƙaci shugaban ƙasar ya daina yawo ƙasashen waje, ya mayar da hankali kan ziyartar jihohin Nijeriya guda 36 a cikin sauran shekaru biyu na mulkinsa.
Dangane da taɓarɓarewar dimokuraɗiyya, Obi ya gargaɗi Tinubu da ya yi koyi da marigayi Shugaba Umaru Yar’Adua, wanda ya amince da cewa zaben da ya kawo shi mulki ba shi da inganci. Ya kuma nuna cewa tsohon shugaban ƙasa Goodluck Jonathan ya ceci dimokuraɗiyya ta hanyar amincewa da kayen da ya sha a zaben 2015.
Obi ya ƙara da cewa, a halin yanzu, Nijeriya ba ta cikin tsarin dimokuraɗiyya na gaskiya, inda aka samu koma baya a fannonin tattalin arziki, da ilimi, da lafiya, da tsaron jama’a. Ya bayyana cewa kuɗin da aka karɓa a matsayin bashi bai yi tasiri ba, yayin da yawan talauci, da ficewar kamfanoni masu zaman kansu daga Nijeriya, da rashin abinci mai gina jiki ke ƙaruwar.
Ya kammala da cewa, “Gwamnatin ta yi amfani da kuɗaɗe da yawa fiye da gwamnatocin Yar’Adua, Jonathan, da Buhari jimilla, amma babu wani cigaba da aka samu.”
