A cikin watan Ramalana muna koyon haƙuri wajen cimma kyawawan burace-buracenmu. Ramalana makaranta ce ta juriya da sadaukarwa. Yana koya mana cewa babu damuwa, babu aibi, babu hasara idan mutum ya bar wasu abubuwan more rayuwa na ɗan lokaci domin neman jin daɗi na har abada.
Azumi ba abu ne sauƙi ba, yana buƙatar ka bar abin da kake so kuma kake iya samu, domin samun wani matsayi a wurin Allah. Mumini yana barin abinci, da ruwa da sauran abubuwan jin daɗi ne saboda Allah. Wannan barin da ya yi, ba rashi ba ne, face jarabawa ce da za ta haifar da riba mai girma a duniya da lahira. Manzon Allah (S.A.W ) ya bayyana girman ladan azumi da cewa mutum na iya samun gafarar Allah ta dalilinsa, idan ya yi shi da imani da neman lada. Azumi yana kankare zunubai, yana ɗaukaka darajoji, yana tsarkake zuciya.
- Darussa Daga Ramadan Na 6: Girmama Ni’ima Da Gujewa Almubazzaranci A Ramalana
- Darussa Daga Ramadan Na 5: Tsare Gaɓɓai Daga Saɓo
Ka lura da girman ladan azumin rana guda kacal. Ya zo a cikin Sunan na an-Nasa’i cewa Manzon Allah (S.A.W) ya ce:” Duk wanda ya yi azumin rana ɗaya domin Allah,to, Allah zai nisanta fuskarsa daga wuta tsawon tafiyar shekara saba’in”
Wannan hadisi Muhammad Nasiruddin al-Albani ya inganta shi.
Ka yi tunani: rana ɗaya kacal! Amma ladanta kariya ce daga wuta tsawon tafiya mai nisa ƙwarai. Wannan yana nuna cewa abin da muke gani ƙarami a duniya, a wurin Allah yana da girma matuƙa idan ya kasance da ikhlasi.
Ramalana yana koya mana darasin jinkirta jin daɗi. Watau ka bar jin daɗin yanzu domin ka samu mafi girma a gaba. Wannan hikima ce da ta shafi duniya ma; duk wanda ya iya haƙuri, ya jure wahala kaɗan domin manufa mai girma, shi ne yake kaiwa ga nasara. Mumini yana barin jin daɗi na wucin gadi domin tsira da rabauta a ranar Lahira. Yana jure yunwa domin cikewar rahama. Yana jure ƙishirwa domin shan ruwan Aljanna. Yana jure gajiya domin dawwamammen hutu.
Haƙuri a Ramalana ba kawai haƙurin yunwa ba ne, har ma haƙuri ne a kan ibada, da haƙuri a kan nisantar saɓo, da haƙuri a kan kyautatawa mutane, da haƙuri a kan gyaran hali.
Idan muka fita daga Ramalana da wannan darasi, to za mu zama masu iya jure wahalhalun rayuwa domin manyan manufofi. Za mu iya barin haram domin halal, za mu iya barin ƙarya domin gaskiya, za mu iya barin son zuciya domin yardar Allah.
Allah Ya ba mu haƙuri na gaskiya, Ya karɓi azuminmu, Ya nisanta mu daga wuta, Ya kuma sa mu cikin masu rabauta a ranar Lahira. Amin.
Abu Razina Nuhu Ubale Ibrahim Paki
