A makon da ya gabata, Jiragen Ruwa shida ɗauke da aƙalla Man Fetur samfarin PMS Lita miliyan da Man Dizil 212.7 da aka ƙiyasta kuɗinsu ya kai Naira biliyan 279, sun isa, Tashoshin Jiragen Ruwa na ƙasar nan.
Wannan na zuwa ne, a yayin da Matatar Mai ta Ɗangote, ke ci gaba da dakon umarnin babbar kotun tarayya kan ƙarar da mahukuntan Matatar ta shigar a gaban kotun, na a dakatar da shigo da Man Fetur da aka tace a ƙetare, zuwa cikin ƙasar nan.
Sai dai, kamfanin Man Fetur na ƙasa NNPCL da kuma ƙungiyoyin dilalan Man Fetur da ke a ƙasar, tuni, suka ƙalubalanci, wannan buƙatar, ta mahukuntan Matatar Man ta Ɗangote.
Rahoton Hukumar ta NPA na shigowa da kayan cikin ƙasar nan da kuma fitar da su, ya sanar da shigo da Man na Fetur da Dizil a ranar Laraba.
Jiragen, sun sauka ne, a Tashoshin Apapa da Tincan da ke a jihar Legas da kuma ta Kalaba, inda kuma wasu Jiragen, za su gaba da sauka.
A cewar rahoton, Jirage shida ne, suka yi dakon na Man Fetur, inda kuma ɗaya, ya ɗauko, Man Dizil.
Gaba ɗayan Jiragen, sun ɗauko kayan da nauyin su, ya kai daga metric tan 157,000 na Man Fetur, inda kuma na Man Dizil ya kai metric tan 132,000 tare da kuma Man AGO metric tan 25,000.
Farashin Man a yanzu a Matatar Man Ɗangote, ya kai Naira 1,250 kan kowacce Lita ɗaya, wanda aƙalla, ya kai Lita biliyan 229.1.
Kazalika, Man Dizil, ya kai Lita miliyan 29.4, wanda duk farashin Lita ɗaya, ya kai Naira 1,700 a Matatar ta Ɗangote.
Duba da hauhawan farashin kuɗaɗen musaya na ƙasashen waje, musamman na dala wanda Naira ta kai kan farashin 1,360 kan kowacce dala ɗaya, hakan ya nuna cewa, jimlar kuɗin kayan da aka shigo da su, sun kai kimanin dala miliyan 205.
Ta shigar da Aaknata Janar na ƙasa Lateef Fagbemi SAN da kuma kamfanin Man Fetur na ƙasa, NNPCL a gaban babbar kotun tarayya da ke a jihar Legas.
Kmafanin, ya buƙaci kotun da ta dakatar da hukumar haƙo Mai na cikin Ruwa, da ci gaba da bai wa, dilalan Man Fetur a cikin ƙasar nan Lasisin, damar shigo da Man, wanda Matatar ta Ɗangote, ta yi iƙirarin cewa, hakan na ci gaba da yin zagon ƙasa, kan ƙoƙarin da ake ci gaba da yi, na tace Man da kuma zuba jari, a fannin, a cikin ƙasar.
Aliko Ɗangote dai, ya sha zargin wasu kamfanonin Mai da wasu jami’ai a fannin tace Man a ƙasar nan, kan yin zagon ƙasa, na ci gaba da shigo da Man da aka tace, daga ƙetare, zuwa cikin ƙasar nan, duk da cewa, Matatarsa, na tace Man da ya kai yawan Ganguna, 650,000 ako wacce rana.
