Fadar shugaban ƙasa ta yi gargaɗi ga tsohon gwamnan Anambra, Peter Obi, kan yi wa Shugaban ƙasa, Bola Tinubu ƙarya kan rikicin da ke ci gaba a gudana a jam’iyyar ADC.
An bayyana wannan a cikin wata sanarwa da mai bai wa shugaban ƙasa shawara na musamman kan harkokin yaɗa labarai, Bayo Onanuga, ya fitar a ranar Litinin.
- Kabiru Marafa Ya Jagoranci Daruruwan Mabiyansa Zuwa ADC A Zamfara
- ADC Reshen Kaduna Ta Buƙaci Gwamnati Ta Daina Tsangwamar El-Rufai
Onanuga ya bayyana zargin a matsayin mara tushe, kuma ya jaddada cewa rikicin ADC ya samo asali ne daga mambobinsa.
“Bayan kammala amfani da jam’iyyar LP wajen fafatawa a neman ofishin mafi girma a ƙasar, Obi ya bar ta cikin wani irin yanayi na buƙatar ƙashin kai ba tare da ya nuna jagoranci wajen warware rikicin jam’iyyar ba.
“Maimakon haka, sai ya juya zuwa ga ƙungiyarsa ta ‘Obidient’, wanda ta fi yin aiki ta intanet fiye da a fili, ba tare da ya mayar da shi zuwa tsarin siyasa na kansa ba.
“Sanin cewa yana buƙatar tsarin jam’iyya don cika burinsa na tsayawa takarar shugabancin ƙasa, Obi ya koma ADC kuma ya yi nasara har amshe shi hannu biyu.
“Babu wani bincike mai inganci da aka bayyana cewa sabon masu mallaka suka yi, wanda ya haifar da rikicin da ake ciki yanzu. Wane alaƙa Shugaba Tinubu ke da shi da duk wannan? Babu ko guda ɗaya.
“Obi da tawagarsa dole su warware matsalolin cikin jam’iyya kafin su fafata don neman samun tikitin takarar shugaban ƙasa a 2027.
“Zargin shugaban ƙasa kan wannan al’amari da bai da hannu a ciki ba kawai magana ce mara tushe kuma yunƙuri ne na rashin adalci da tabbarar da rusa dimokuraɗiyarsa.
“Gaskiyar cewa Obi ya zo na uku a shekarar zaɓen 2023 ba zai samu irin wannan sakamako ba a 2027.
“Shugaba Tinubu, a matsayinsa na wanda ke riƙe da muƙami mafi girma a Nijeriya, ya samu nasarori masu yawa, amma har yanzu Obi ya makance yana sukar su ba tare da wasu hujjoji ba. Ya bari ya samu damar zama ɗan takarar shugaban ƙasa kafin yin zargin,” in ji fadar shugaban ƙasa.
