Kawo yanzu dai an kammala duk wani shiri na zuwa gasar cin kofin duniya bayan kammala duk wasu wasanni na cike gurbi ko kuma wasannin neman cancanta inda a ƙarshen watan da ya gabata aka kammala buga wasannin kuma duk ƙasar da za ta buga gasar yanzu ta san kanta kuma ta san cikin rukunin da take.
Sai dai ɗaya daga cikin ƴan wasan gaba mafi shahara a duniyar ƙwallon ƙafa a tsawon shekara 15 da suka wuce – ɗan ƙasar Poland Robert Lewandowski – yana cikin manyan ƴanwasan ƙwallon ƙafa da ba za su je gasar kofin duniya ba da za a yi a Canada, Amurka da kuma Meɗico a wannan shekara da muke ciki.
Ɗan wasan mai shekara 37 da ke buga wa ƙungiyar Barcelona wasa, wanda ya zura ƙwallaye 89 a ƙasarsa, ya kasa taimaka mata zuwa gasar kofin duniya bayan da suka yi rashin nasara a hannun Sweden da ci 3-2 a birnin Stockholm ranar Talata, a wasan ƙarshe na neman gurbin ɗuwa gasar ta cin kofin duniya.
Lewandowski, wanda ya lashe gasar Bundesliga ta Jamus har sau goma – biyu da Borussia Dortmund sai kuma guda takwas a jere da Bayern Munich, kafin cin La Liga biyu da Barca – za a iya cewa ya buga wasansa na ƙarshe a matakin ƙasa a ƙasar tasa kuma tuni ya bayyana cewa ya yi bankwana da wakiltar ƙasar tasa.
Rashin samun nasarar Poland a gasar cin kofin duniya na shekarar 2026 ya sare gwiwar fitattun ƴanwasanta sannan kuma wannan ce dama ta ƙarshe ga ɗanwasa Robert Lewandowski da zai buga wa ƙasar gasar kofin duniya.
Ga jerin ƴanwasan da suka gaza zuwa gasar ta kofin duniya.
Gianluigi Donnarumma (Man City da Italiya)
Mai tsaron raga Gianluigi Donnarumma ya kasance mai tsaron raga mafi ƙwazo a gasar Premier a bana tun bayan komawa Manchester City daga ƙungiyar ƙwallon ƙafa ta Paris St-Germain kan fam miliyan 26 a watan Satumba, bayan taimaka wa ƙungiyar ta Faransa lashe gasar kofi Zakarun Turai a bara.
Duk da kasancewa ɗan wasan da ya fi haskawa lokacin da Italiya ta lashe gasar Euro 2020, yanzu ƙasarsa ta gaza zuwa gasar kofin duniya bayan rashin nasara da ci 4-1 a hannun Bosnia-Herzegoɓina a bugun fenariti ranar Talata. Italiya wadda ta lashe kofin duniya har sau huɗu ta rasa damar fafatawa a gasar ta shekarar 2026 karo na uku a jere.
Babu wata tawaga da ta taɓa lashe kofin duniya kuma ta gaza zuwa gasar cin kofin duniya har sau uku a jere sai Italiya. Ƙasar ba ta samu damar buga gasar kofin duniya ba shekarar 2018 a Rasha, da kuma Ƙatar a shekarar 2022.
Serhou Guirassy (Dortmund da Guinea)
Ɗan wasa Serhou Guirassy ya assasa kansa a matsayin ɗaya daga cikin ƴan wasan gaba mafi hazaƙa a duniyar ƙwallon ƙafa, inda ya zura ƙwallaye 62 a Bundesliga a cikin kakar wasanni uku da suka gabata, sannan babu ɗan wasan da ya ci ƙwallo sama da 13 wanda ya zura a gasar Champions League na kakar 2024-25. Sai dai, ba zai samu damar zuwa gasar kofin duniya ba, saboda ƙasarsa ta Guinea ta fita tun a zagayen farko na neman gurbi a ɓangaren Afirka, inda suka ƙare a matsayi na huɗu a rukuninsu, nasara huɗu kacal da kuma canjaras guda uku a cikin wasanni goma.
Khvicha Kɓaratskhelia (PSG da Georgia)
Khvicha Kɓaratskhelia ya taimakawa ƙungiyar ƙwallon ƙafa ta Paris St-Germain zama Zakarun Turai a bara, inda ya zura ƙwallo a wasan ƙarshe da suka doke Inter Milan 5-0. Ya kuma zo na 12 cikin jerin ƴan wasan da suka fi haskawa na kyautar Ballon d’Or. Sai dai Georgia ba ta taɓuka wani abin kirki ba a wasannin neman gurbin zuwa gasar kofin duniya, saboda maki uku kaɗai suka samu a cikin rukunin da ya ƙunshi ƙasashen
Spain, Turkiyya da kuma Bulgaria.
Lewandowski (Barcelona da Poland)
Lewandowski ya jagoranci Poland zuwa gasar kofin duniya ta 2018 a Rasha, sai dai bai zura ko da ƙwallo ɗaya ba inda ƙasarsa ta ƙare a ƙarshen teburin rukuninsu. Ya samu haskawa a gasar kofin duniya da aka yi a Ƙatar a 2022, inda ya zura ƙallo biyu har da kai Poland zagayen ƴan 16, kafin Faransa ta doke su.
Ya ci ƙwallaye huɗu a wasan rukuni na neman gurbin zuwa gasar kofin duniya na 2026, inda ƙasarsa ta ƙare a ƙasan Netherlands wadda ta fi ta da maki uku – kafin su yi rashin nasara a hannun Sweden ranar Talata.
Victor Osimhen (Galatasaray da Nijeriya)
Kawo yanzu dai Nijeriya bata da ɗan wasa kamar Ɓictor Osimhen, a shekarun baya ya taimaka wa Napoli ta lashe Serie A a 2023 kafin ya koma Galatasaray, inda ya zura ƙwallaye 26 a cikin wasanni 30, abin da ya ba su nasarar lashe gasar Turkiyya a bara. Nijeriya ta yi canjaras biyar a cikin wasanni 10 na neman gurbin zuwa kofin duniya, inda ta ƙare maki ɗaya ƙasan Afirka ta Kudu, sai dai sun samu dama ta biyu a wasan neman gurbi da ya biyo.
Nijeriya ta yi rashin nasara a hannun Kongo a bugun fenariti wanda aka buga bayan sauya Osimhen, abin da ya sa ƙasar ta kasa zuwa gasar kofin duniya.
Nijeriya ce ta 26 a jerin hukumar FIFA, kuma wannan ne karo na biyu da ba za ta samu damar bugar gasar ba a jere. Nijeriya ba ta samu damar shiga gasar ba a 2022 da aka yi a Ƙatar, tun bayan rashin fafatawarta a shekarar 2006. Nijeriya na taka rawar gani a duniyar ƙwallon ƙafa, inda take da fitattun ƴanwasa irin su Ɓictor Osimhen, Ademola Lookman, Aleɗ Iwobi, Calɓin Bassey, da Samuel Chukwueze. Sai dai duk da haka sun kasa kai wa matakin nasara.
Dominik Szoboszlai (Liverpool da Hungary)
Ɗan wasan tsakiyar Liverpool da Hungary Dominik Szoboszlai yana haskawa sosai a bana kuma ya ci ƙwallaye masu ƙayatarwa da ban sha’awa. Sai dai ba zai samu damar zuwa gasar kofin duniya ba bayan da ƙasarsa ta sha kashi a hannun Jamhuriyar Ireland da ci 3-2.
Sauran ƴan wasan da ba za su je gasar ba sun haɗa da; mai tsaron raga Jan Oblak (Atletico Madrid da Sloɓenia).
Milos Kerkez (Liɓerpool da Hungary).
Nikola Milenkoɓic (Nottingham Forest da Serbia)
Willi Orban (RB Leipzig da Hungary).
Ola Aina (Nottingham Forest da Nigeria).
Sandro Tonali (Newcastle da Italiya)
Bryan Mbeumo (Manchester United da Kamaru).
Ƙasashe shida da suka rage sun kammala wasanninsu, abin da ke nuna cewa yanzu ƙasashe 48 ne za su fafata. Jamhuriyar Dimokradiyyar Kongo da Iraƙi su ne ƙasashe biyu na ƙarshe da suka samu nasarar shiga gasar. DR Congo ta doke Jamaica, yayin da Iraƙi ta doke Boliɓia. An tabbatar da sauran ƙasashen turai huɗu ne a ranar Talatar da ta gabata, inda Bosnia-Herzegoɓina da Jamhuriyar Czech da Turkiya da Sweden suka samu nasara. Cikin ƙungiyoyi 48 da za su fafata, ƙasashe ukun da za su karɓi baƙuncin gasar sun samu tikiti kai tsaye, yayin da 43 kuma suka fafata a wasannin neman cancantar shiga gasar, sai kuma biyu da suka samu gurbin ta hanyar wasannin kifa ɗaya ƙwala a nahiyoyinsu.
Discussion about this post