Kocin ƙungiyar ƙwallon ƙafa ta Coventry City Frank Lampard ya sanya hannu kan sabuwar yarjejeniya da ƙungiyar wadda za ta sa ya ci gaba da kasancewa tare da ƙungiyar ta Premier League har zuwa shekarar 2029, kamar yadda aka sanar a ranar Talata, Lampard ya jagoranci Sky Blues ɗin wajen samun nasarar dawowa gasar Premier League a karon farko cikin shekaru 25 ta hanyar lashe gasar Championship da ya yi.
Tsohon ɗan wasan tsakiyar na Ingila mai shekaru 48 ya karɓi ragamar ƙungiyar dake Midlands a watan Nuwambar shekarar 2024 inda ya kusa kai wa gasar Premier League a shekararshi ta farko a ƙungiyar kafin Sunderland ta doke shi a wasan kusa da na ƙarshe, Lampard ya bayyana matuƙar farin ciki akan sabon kwantiragin da ya ƙulla da Coɓentry inda yace, “Ina matuƙar farin ciki da na sanya hannu akan sabon kwantiragi a wannan ƙungiya, hakan ya zama abin alfahari ne a wajena” in ji Lampard.
Lampard wanda ta taɓa kocin manyan ƙungiyoyi a Ingila irin su Chelsea, Everton da Derby, ya ƙara da cewa, “Muna fatan za mu maimaita ƙoƙarin da muka yi a gasar Championship a wannan gasar ta Premier League domin ganin mun samar da sakamako mai kyau da magoya bayanmu za su yi alfahari damu”, Coventry City za ta buga wasan farko da Arsenal wadda ta lashe gasar Premier League ta bana.
