Jami’an Hukumar Tsaron ta Nijeriya ta (NSCDC) reshen Jihar Kano sun kama wasu mutum 10 da ake zargi da aikata laifuka daban-daban da suka haɗa da lalata kayayyakin gwamnati, sata, haɗa baki wajen aikata laifi, shiga haramtacciyar hanya da kuma karɓar kayan sata.
A wata sanarwa da jami’in hulɗa da jama’a na hukumar, SC Ibrahim Abdullahi, ne ya fitar ranar Laraba, ya ce an kama waɗanda ake zargin a wurare daban-daban a Jihar.
Sanarwar ta ce wuraren da aka kama su sun haɗa da Gwarmai a Ƙaramar Hukumar Ghari, yankin masana’antu na Challawa, Unguwar Rimi da Waratallawa duk a Ƙaramar Hukumar Kumbotso ta Jihar Kano.
Sanarwar ta ƙara da cewa: “Rundunar NSCDC ta Jihar Kano ta samu nasarar cafke wasu gungun masu aikata laifuka 10 da ake zargi da lalata kayayyakin gwamnati, sata, haɗa baki wajen aikata laifi, shiga ba bisa ƙa’ida ba da kuma karɓar kayan sata.”
An kuma bayyana cewa kwamandan hukumar na Jihar, Commandant Mohammed Hassan Agalama IION, ya gabatar da waɗanda ake zargin a hedikwatar rundunar ranar Talata.
Kayayyakin da aka ƙwato daga hannunsu sun haɗa da mita 200 na wayoyin aluminium, wayoyin hannu, wayoyin copper, power bank da kuma muggan makamai kamar wuƙaƙe, adda, takobi da almakashi da sauransu.
Sanarwar ta ce an kammala bincike kuma nan ba da jimawa ba za a gurfanar da waɗanda ake zargin a kotu domin fuskantar hukunci.
Kwamandan ya sake jaddada ƙudirin hukumar wajen kare muhimman kadarorin ƙasa da kayayyakin more rayuwa, tare da nuna rashin amincewa da duk wani nau’in aikata laifi. Ya kuma roƙi al’ummar Jihar Kano da su ci gaba da bai wa hukumomin tsaro bayanai domin magance matsalolin tsaro.
A wani labarin kuma, rundunar NSCDC ta Jihar Kwara ta kama wasu mutane uku bisa zargin haƙar ma’adanai ba bisa ƙa’ida ba da kuma safarar ma’adanai a birnin Ilorin.
Waɗanda aka kama sun haɗa da Musa Abdullahi mai shekara 45, Aliyu Ibrahim mai shekara 20 da Ishaƙ Ibrahim mai shekara 51. An ce an kama su ne a wani samame na sirri da jami’an sashen ma’adanai da ƙarafa na rundunar suka gudanar da daddare.
