A makon da ya gabata ne, a hukumance aka ƙyanƙashe wani sabon nau’in Zakara tare da yi masa rijista, wanda ake kira da ‘MoorBeta’.
Har ila yau, an bayyana cewa; wannan nau’i na da ɗauke da wasu manyan abubuwa da masu kiwonsa za su amfana da su.
An dai sanar da wannan sabon nau’i ne a wani taro karo na 36 da kwamitin ƙasa na jinsin dabbobi (NACGRAB), ya gudanar.
Shugaban kwamtin, Farfesa Soji Olufajo ne ya jagoranci taron, wanda ya gudana a garin Ibadan.
- Manoma Da Dama Za Su Yi Watsi Da Fannin Noma A Taraba A 2026 -AFAN
- Yadda Masu Kwace Suka Yanke Wa Malamin Makaranta Hannu A Kano
Wata tawagar gudanarwa daga cibiyar bincike da bayar da horo kan lafiyar kaji da kula da aikin noma ta ƙasa (IAR&T) ce, ta sanya ido kan ƙyanƙyasar nau’in na ‘MoorBeta’.
An dai samar da wannan nau’i ne, saboda ƙananan masu kiwon kaji, wanda kuma za a iya kiwata nau’in a kowane irin yanayi na ƙasar.
A cikin mako goma kacal, zakaran na ‘MoorBeta’, nauyinsa zai iya kai wa kimanin kilo 2.8, musamman idan ana ciyar da shi abinci yadda ya kamata.
An fi samun mai farin gashi ko mai ɗauke da gaurayen ruwan ƙasa ko baƙi ko kuma ja, wanda kuma ya kasance yana da girma, inda ake samun nama mai yawa tare da shi.
Bisa fashin baƙin da aka yi a 2025 na ribar da ake samu daga kiwon nau’in na ‘MoorBeta’, musamman wanda ya kiwata guda 100, zai iya samun ribar da ta kai ta kimanin naira 278,000, a cikin mako goma kacal.
Ma’aikatar Bunƙasa Kiwon Dabbobi, ta yi maraba da wannan nau’in, wanda ta alaƙanta a matsayin wanda zai ƙara tallafawa, wajen samar da nama a ƙasar.
A cikin sanarwar da ma’aikatar ta fitar ta ce, za ta ci gaba da yin aiki kafaɗa da kafaɗa da cibiyoyin binciken, musamman domin a ƙara samar da nama da kuma ƙara ƙarfafa samar da kuɗaɗen shiga ga masu kiwata irin wannan nau’in.
Kazalika, kwamitin ƙasa na tantance nau’ika wato NƁRC, a wani taron da ya gudanar a a garin Ibadan, ya fitar da wani nau’ikan masara biyu da ake kira da ‘ARTPOP 001’ da kuma ‘ARTPOP 002’ wanda cibiyar NACGRAB, ta ƙirƙiro da su.
A cewar cibiyar, waɗannan nau’ikan biyu na zakaran da kuma na masarar, za su taimaka wajen ƙara samar da wadataccen abinci a ƙasar.
Ta ƙara da cewa, wannan babban ci gaban da aka samar, ya nuna a zahiri na irin mayar da hankali da cibiyar ke ci gaba da yi, wajen bunƙasa fannin gudanar da bincike tare kuma da nufin ƙara haɓaka fannin noma na manoman da ke ɗaukacin faɗin ƙasar nan baki-ɗaya.
Wannan sabon nau’in na masara, an samar da shi ne bisa jaroranci tawagar masu bincike a cibiyar da Farfesa D. J. Ogunniyan, tare da shugaban sashen shirin haɓaka fannin noman Masara J. O. Olasoji, da kuma shugaban sashen samar da ‘yaƴan Itatuwa Farfesa. O. F. Owolade, suka jagoranta.
Shin Ina Batun Nau’in Kajin ShikaBrown Da Cibiyar Bincke Ta Shika Ta Ƙirƙiro Da Su?
A kwanakin baya, cibiyar gudanar da binciken lafiyar dabbobi da ke garin Shika a Ƙaramar Hukumar Zaria, wato NAPRI ta ƙirƙiro da wani nau’in Kaji da ake kira da ‘ShikaBrown chicken’.
Sai dai, duk da irin muhimmancin da wannan nau’i yake da shi, musamman domin ƙara bunƙasa tattalin arziƙin masu kiwon kaji da ke wannan ƙasa, musamman ƙananan masu kiwon kajin, ya kasance ba sa iya samun wannan nau’i a cikin sauƙi.
Amma, bisa uzurin da cibiyar ta NAPRI ta bayar kan wannan ƙalubale, ta bayyana cewa; rashin samar da wadatatun kuɗaɗe ne, suka sanya ba ta iya samar da wadataccen wannan nau’i a Nijeriya, musamman ga ƙananan masu kiwon kaji.
Kazalika, masu ruwa da tsaki a fannin kiwon kaji a ƙasar nan, na ci gaba da bayyana fargabarsu, kan ɗorewar wannan sabon nau’i na MoorBeta a ƙasar nan. musamman yadda rashin samar da wadatatun kuɗaɗe ga ɗimbin cibiyoyin gudanar da binciken da ake da su a ƙasar.
Discussion about this post