Wata gobara da ta tashi da asubahin ranar Juma’a ta ƙone aƙalla shaguna 50 a Kasuwar Fatima Simra Multi-Purpose da ke yankin Dakata a Jihar Kano.
Shugaban kwamitin kashe gobara na kasuwar, Dauda Haruna Chula, ya tabbatar da faruwar lamarin, yana mai cewa gobarar ta fara ne da misalin ƙarfe 5:40 na safe, kuma har zuwa lokacin tana ci gaba da yaɗuwa.
- Ƴan Kasuwa 7 Sun ɓace, Asarar Dukiya Ta Haura Biliyan 5 A Gobarar Kasuwar Singa
- Gobara Ta Hallaka Mutum 2, Ta Lalata Dukiya Ta Biliyan 1.59 A Bauchi
Ya bayyana cewa galibin shagunan da abin ya shafa ƙanana ne da ke harkar sarrafa mai da kuma sake sarrafa robobi da leda. A cewarsa, an sanar da Hukumar Kashe Gobara ta Jihar Kano da sauran hukumomi masu ruwa da tsaki, waɗanda suka tabbatar da samun bayanin faruwar gobarar.
Har yanzu ba a tantance girman asarar da aka yi ko yiwuwar asarar rayuka ba, yayin da ‘yan kasuwa ke nuna damuwa kan jinkirin kai ɗauki. Lamarin na zuwa ne mako guda bayan wata babbar gobara ta shafi ‘yan kasuwa sama da 1,000 a Kasuwar Singa a Kano.
