Bayan da Makarantun ‘Functionalism’ da ‘Conflict’ suka gama yayinsu, inda kowannensu ya yi bayanin tsarin zamantakewa daidai da fahimtar makarantarsa, an samu bullar makarantar ‘Symbolic Interaction’ wacce ta zo domin yin bayanin wani muhimmin abu wanda wadancan makarantu biyu suka kawar da kai ga bayaninsa.
Dalton Conley a littafinsa ‘Introduction to thinking like a Sociologist’ ya bayyana cewa, masani Herbert Blumer ne ya sanya wa wannan makaranta suna ‘Symbolic Interactionism’. Domin karin tabbaci, George Ritzer a littafinsa na ‘Encyclopedia of Social Theory’ ba kawai ya tabbatar da batun cewa Blumer ne ya samarwa da makarantar sunan ba, ya fadi shekarar wato 1937, da Blumer din ya kirkiri sunan.
Wannan kuma ba yana nufin sai bayan zuwan Blumer ba ne sannan aka fara yin bayanai masu alaka da ‘Symbolic Interactionism’, tun kafin shi sai da George Herbert Mead ya yi wa wannan makaranta hidima sosai. Rubuce-rubucensa har yanzu suna taka muhimmiyar rawa wurin fahimtar gudummawar makarantar ‘Symbolic Interactionism’ ga rayuwar al’umma, musamman littafinsa na ‘Mind, Self and Society’; littafin da George Ritzer ya yi ikirarin cewa, ya fi kowanne littafi muhimmanci a wannan makaranta.
Kafin na shiga bayani, zan so mu fahimci wani abu mai muhimmancin gaske wanda shi ne asasin bambancin da ke tsakanin wadancan makarantu biyu da wannan da za mu yi bayani. ‘Functionalism’ da ‘Conflict’ makarantu ne da suke kallon daukacin al’umma wurin gabatar da bayanansu. Babu ruwansu da dabi’ar mutum a shi daya tilo ko mu’amalarsa tsakaninsa da sauran mutane, suna damuwa ne da abubuwan da ke iko da dabi’u a jam’i da kuma bangarorin al’umma (structures) irinsu bangaren iyali, bangaren ilimi, bangaren soja, bangaren tattalin arziki da sauransu.
Domin cike gibin da wadancan makarantu biyu suka bari ne ya sa aka samar da wannan makaranta ta ‘Symbolic Interactionism’, wacce ta doru bisa fahimta da yin bayani kan mu’amalar da muke gudanarwa ta yau da kullum a tsakaninmu (wato daidaiku) da kuma irin ma’anonin da muke bayarwa ga abubuwan da muke rayuwa da su.
A cikin al’umma akwai alamomi da yawa wadanda sune ke saita mu’amalarmu ta yau da kullum. Kuma wadannan alamomin kowannensu yana da yadda ake koyo da fahimtar jingina mishi bayani da muhimmanci. Misali da takalmi, ba kawai don mutum ya fahimci cewa ga wani abu sunanshi takalmi ba shi kenan, a’a dole ne ka fahimci cewa, wani abu ne da mutane ke sanya kafarsu a ciki domin gujewa lalata kafa yayin taka kasa. Don haka mutum idan ya ga takalmi a ganin ido ya san cewa abin sanyawa a kafa ne da ke da muhimmanci a wurinsa.
A wancan misalin na sama, mun fahimci cewa muhimmanta abu a kashin kansa koyo ake yi. Idan ka samu mutanen da babu ruwansu da sanya takalmi don ba su da damuwa ko da kafafunsu za su fashe. Irin wadannan mutanen a wurinsu takalmi ba shi da wata kima ko mutunci.
Babban abin da ya sa mutum ya fi dabba shi ne karfin ikon da yake da shi wurin isar da sako ba tare da ya yi furuci da bakinsa ba. Misali, Kai ne kana tafiya sai ka ga Akuya a gefen titi zaune, ga kuma gawar Zaki a gefe. Ga dukkan alamu Akuyar a firgice take, sai ka nufi wurinta ka tambayeta, shin ke ki ka kashe Zakin nan? Babu amsa.
Toh kwatanta da mutum. Ka zo wucewa sai ka taras da gawa a gefe cikin jini, ga kuma wani mutum a gefe yana kuka kusa da gawar. Ko da ganin mutumin cikin firgici da kaduwa yake. Da ka yi masa magana ba iya amsawa saboda kaduwa. Sai ka tambaye shi, ‘Shin kai ne ka kashe wannan? A nan mun ce mutumin ba ya iya magana saboda firgici. Bambancinsa da dabba shi ne, zai iya bayar da amsa ba tare da yin furuci ba. Mutumin zai iya kada kansa dama da hagu (wanda hakan na alamta a’a, ba ni ba ne) ko kuma ya kada kansa sama (ma’ana eh, ni ne).
Wannan makaranta ta ‘Symbolic Interactionism’ ta ce, shi mutum yana da salo da dabarun isar da sakonni ta hanyoyi da yawa. Ta hanyar idonsa, motsi da gabobin jikinsa ko muryarsa (ba tare da yin furuci ba). Yare (language) kawai da mutum ke yi wani babban abu ne da ya nuna kololuwar darajarsa fiye da dabba. Wanda shi ma koyo ake yi ta hanyar mu’amala.
Makarantar ta ‘Symbolic Interactionism’ ta tafi kan cewa, an yi wa mutum baiwa ta iya fahimtar motsi ko wani aiki da wasu suka aikata. Mutum yana koyon abubuwa da yawa a yayin da yake mu’amala musamman da mutanen da yake ganin sune abin koyi a wurinsa. Za ka ga yana kwaikwayon salon maganarsu, salon shigarsu, salon tafiya da dai sauransu.
Discussion about this post