Jami’an Rundunar ‘Yansandan Nijeriya sun cafke wata matar aure mai suna Rahimat Salaum a lokacin da take kokarin tserewa bayan ta kashe mijinta da yake fama da rashin lafiya tare da kona gawarsa.
Lamarin wanda ya faru a Pegi, Abuja, an gano shi ne a lokacin da jami’an ‘yansanda na hukumar ‘yansanda na Babban Birnin Tarayya Abuja da ke ofishin ‘yansanda na Pegi, da misalin karfe 6:00 na yamma, suka kama wanda ake zargin, inda ta kwashe duka dukiyoyin marigayin a cikin mota.
- Rushewar Gine-gine A Nijeriya: Ina Mafita?
- Ayyukan Hanyoyin Gwamnatin Tarayya Da Aka Yi Watsi Da Su A Jihohin Arewa 14
Kakakin rundunar ‘yansandan Babban Birnin Tarayya Abuja, SP Josephine Adeh, yayin da take tabbatar da faruwar lamarin, ta ce: “A bisa ga sahihan bayanan sirri, jami’an sun kama Rahimat Salaum da ke Pegi, Abuja dangane da kashe mijinta.
“Wanda ake zargin tana yunkurin guduwa ne da kayan mijin, kuma rahotanni sun bayyana cewa ya shafe kusan kwanaki uku a cikin wata karamar mota inda jami’an ‘yansanda suka kutsa kai suka kama ta.
“Da aka yi mata tambayoyi, wacce ake zargin ta amince da kashe mijin nata bayan da aka aki ruwa rana da ita, daga bisani ta jagoranci ‘yansandan zuwa wani kango inda ta jefar da gawar da ta kone.
Yayin da ake ci gaba da gudanar da bincike, kwamishinan ‘yansanda na Babban Birnin Tarayya Abuja, CP Benneth Igweh, ya yi fatan tabbatar da cewa za a yi adalci a lamarin, domin ya bukaci mazauna yankin da su yi taka-tsan-tsan da muhallinsu tare da kai rahoton abubuwan da basu aminta da su ba.
