Shugaba Bola Tinubu ya nuna baƙin ciki game da harin bam da aka kai a ƙaramar hukumar Konduga, jihar Borno a ƙarshen mako, inda ya kira harin a matsayin rashin jaruntaka da harin tsoro daga ƴan ta’adda.
A wata sanarwa daga kakakinsa, Bayo Onanuga, Shugaban ya buƙaci hukumomin tsaro da su ƙara ƙaimi wajen maganin gungun ƴan ta’addar Boko Haram da ke kai hare-hare kan mutanen gari. Ya kuma umarci hukumar NEMA da ta taimaka wa waɗanda harin ya rutsa da su.
- Ƴansanda Sun Gargaɗi Masu Lalata Fastar Tinubu A Kano
- Sojoji Sun Kashe Babban Kwamandan Boko Haram A Jihar Yobe
A wani ɓangare kuma, Shugaban ya nuna juyayi ga iyalan waɗanda suka mutu da waɗanda kuma suka jikkata sakamakon fashewar da ta faru a wata masana’anta a jihar Kano ranar Asabar. Fashewar ta shafi mutane 15, ciki har da mutane biyar da suka rasu.
Tinubu ya jaddada muhimmancin kiyaye ƙa’idojin tabbatar da amincin aiki, tare da umurnin cikakken bincike kan lamarin. Ya kuma yi kira ga jami’an tsaro da su dage wajen tabbatar da zaman lafiya a duk faɗin ƙasar.
Hukumar NEMA ta ce tana aiwatar da umarnin Shugaban kasa, yayin da ‘yan sandan Kano ke ci gaba da binciken fashewar.
