Rundunar ‘yansandan Nijeriya ta kama wasu mutum uku tare da kwato bindiga AK-47 da aka kera ba bisa ka’ida ba, harsasai, bindigogin gargajiya (dane guns), da kuma shanu 46 da aka sato a jerin ayyukan tsaro da aka gudanar a Jihar Sokoto.
A cewar wata sanarwa da Kakakin Rundunar ‘Yansanda, Ahmad Rufa’i, ya fitar a ranar Litinin, an gudanar da wadannan ayyuka ne tsakanin watan Afrilu zuwa Mayu a sassa daban-daban na jihar.
‘Yansanda sun ce aikin farko ya faru ne a ranar 29 ga Afrilu, lokacin da jami’ai na ofishin ‘yansanda na Gidan Madi suka samu bayanan sirri kan wasu mutane da ake zargi da ke yankin Tangaza.
Bayan kara sintiri da binciken motoci a hanyar Tangaza zuwa Gidan Madi, an kama mutum uku da ake zargi.
A wani aiki kuma a ranar 3 ga Mayu, jami’an sashen yaki da garkuwa da mutane sun dakile harin satar shanu a kauyen Gidan Bubu da ke Karamar Hukumar Wamakko, bayan samun bayanan sirri cewa ‘yan bindiga sun mamaye kauyen suna harbi kan mai uwa da wabi.
A yayin bin sawunsu, tawagar ta bi su har zuwa dajin Gidan Gawe a Karamar Hukumar Silame, inda ‘yan bindigar suka tsere bayan musayar wuta, suka bar shanu 19 a baya.
Haka kuma rundunar ta ce an kwato shanu 27 a ranar 30 ga Afrilu bayan kiran gaggawa daga masu gadin al’umma a Tangaza, kan motsin wasu da ake zargi na kungiyar Lakurawa.
An gano shanun a kusa da kauyen Zamoriya bayan ‘yan bindigar sun gudu da zarar sun hango jami’an tsaro.
Kwamishinan ‘yansanda, Hayatu Hassan Shaffa, ya yaba wa jami’an da suka gudanar da ayyukan, tare da jaddada aniyar rundunar na yaki da rashin tsaro.
Ya ce irin wannan nasarori na nuna muhimmancin sahihan bayanan sirri da hadin gwiwa tsakanin al’umma da ‘yansanda, yana mai cewa ba za su gajiya ba har sai an kawar da miyagun mutane ko kuma an gurfanar da su a gaban shari’a.
Ya kuma yi kira ga mazauna Tangaza, Gidan Madi, Silame, Wamakko da Kware su ci gaba da ba da bayanai masu amfani ga hukumomin tsaro.
Rundunar ta kara da cewa ana ci gaba da bin sawun wadanda suka tsere domin gurfanar da su da kuma mayar da shanun ga ainihin masu su.
