Jihar Lagos ta rattaba hannu kan yarjejeniyoyin sayen wutar lantarki da kamfanoni uku masu zaman kansu, domin kara yawan wutar da take samarwa daga megawatt 60 zuwa kimanin megawatt 400 cikin shekaru uku masu zuwa.
Gwamnan jihar, Babajide Sanwo-Olu, ne ya jagoranci bikin sanya hannu kan yarjejeniyar da kamfanonin Mainland Power Limited, da Fenchurch Power Limited da Viathan Engineering Limited, wanda ke nuna wani babban yunƙuri na rage dogaro da matsalolin layin wutar lantarki na ƙasa.
Matakin na zuwa ne a daidai lokacin da jihar ke ƙoƙarin kauce wa matsalolin rashin ingancin wutar lantarki daga tsarin ƙasa baki ɗaya, ta hanyar gina tsarin wuta mai zaman kansa da zai riƙa bai wa muhimman ababen more rayuwa wuta kai tsaye.
Ɗaya daga cikin muhimman ayyukan shi ne tashar wutar lantarki ta Akute mai zaman kanta, wadda aka daɗe ba a amfani da ita tsawon shekaru biyar, inda yanzu aka miƙa ta ga kamfanin Fenchurch Power domin gyarawa da sake amfani da ita, tare da samar da wuta ga al’umma da kuma inganta aikin ruwan sha na Adiyan.
Sauran kamfanonin, ciki har da Mainland Power da Viathan Engineering, suna samar da wuta ga muhimman wurare kamar asibitoci, da gidajen gwamnati da sauran cibiyoyi. Kwamishinan makamashi na jihar, Biodun Ogunleye, ya ce ana sa ran wannan haɗin gwuiwa zai ƙara yawan wutar zuwa tsakanin megawatt 200 zuwa 400 cikin shekaru biyu zuwa uku masu zuwa.
Discussion about this post