Tun bayan da gwamnatin tarayya ta ƙirƙiro tare da kuma ƙaddamar da shirin yin amfani da Iskar Gas na CNG, musamman, masu ababen hawa da dama a ƙasar sun yi maraba lale, da shirin.
Sun kalli, shirin a matsayin abinda suka shafe lokaci suna tsimayi, domin samar masu da sauƙi, musamman duba da irin tsawon lokacin da suke shafewa, na bin layi, a gidajen da ake sayar Iskar Gas ɗin.
Gwamnain Shugaba Bola Ahmed Tinubu mai ci, ta ƙirƙiro tare da kuma ƙaddamar da shirin bayan cire tallafin Man Fetur, musamman domin ƙarfafa wa masu ababen hawa, rungumar yin amfani da Isar ta CNG, a bisa burinta na ƙara bunƙasa fannin makamashi a ƙasar.
Kazalika, burin na gwamnatin shi ne, domin masu ababen hawan, su sayi Iskar Gas ɗin ta CNG, a farashi mai rahusa.
Kamar dai tunain sauran ƴan ƙasar, ita ma wannan Jaridar, na kallon shirin a matsayin na CNG a matsayin babban abu na ci gaba, ga fannin sufurin ƙasar.
Wani ƙarin abin la’akari da shirin shi ne, ba wai kawai za a samar da makamashi a farashi mai rahusa bane, ko rage tsadar sufuri, amma shirin, zai ƙara bunƙa tattalin arzikin ƙasar, kamar zuwa matki, irin na duniya.
Tuni dai, ƙasashen da suka ci gaba a duniya, ke ta faman kai gauro da mari, wajen ganin sun rage fitar da sanaran hayaƙin da ke gurbata muhalli, wanda kuma bai kamata, a bar Nijeriya a baya, wajen shiga cikin irin wannan sahun ba.
A bisa wannan hujjar, ita ma wannan Jaridar na goyon bayan, rungumar yin amfani da Iskar ta CNG.
Kazalika, Jaridar ta yi ammana da cewa, rungumar shirin zai taimaka, wajen rage fitar hayaƙin da ke gurɓata muhalli, tare da samar da ingantacciyar Iskar da ƴan Adam, za su iya shaƙa.
Shirin zai kuma rage yawan kuɗaɗen da masu ababen hawa a ƙasar ke kashewa, wajen ci gaba da gyaran ababen hawansu.
Duk da sukar da shirin ya ci karo da ita a baya daga wasu ƴan Nijeriya, musamman kan jinkirin fara gudanar da shi, amma masu ababen hawa da dama, sun karɓi shirin tare da ci gaba da yin amfani da shi, hannu bi-biyu.
Sai dai, inda Gizon ke saƙa a yanzu shi ne, murnar na masu ababen hawan kan shirin na zai samar masu da sauƙi, ta koma ciki, duba da yadda suke shafe awanni a gidajen da ake sayar da Iskar ta CNG.
Ƙarin wata matsalar shi ne, wasu masu ababen hawan musamman motoci, sun kai ga suna yin barci a gidajen sayar da shi, domin su samu damar saye.
Haka zalika, ana kuma ci gaba da fuskantar ƙarancinsa, musamman a mayan biranen ƙasar, ciki har da Abuja da jihar Legas, inda hakan, ya haifar da dogayen layuka, a gidajen da ake sayar da shi.
Ci gaba da ƙarancin na sa, tuni ya jefa shakku da kuma mayar da hannun Agogo baya, ga masu masu ababen hawan, domin a kafin zuwa shirin, sun yi imanin, shirin zai samar da sauƙi.
Tuni dai, wasu masu ababen hawan saboda ƙarancinsa, suka fara yin damar sauyawa, zuwa yin amfani da Iskar Gas ɗin.
Tambayoyin da suke ci gaba da yi ita ce, shin su ne, me ya janyo ƙarancin, mai gwamnatin ƙasar key i kan batun?Da alamu, akwai babban giɓi a ɓangaren gwamnatin na gazawar samar da manyan kayan aiki ga shirin, kafin a fara wanzar da shi.
Misali, rashin samar da tashoshi masu yawa, da masu ababen hawan, za su rinƙa zuwa, domin sayensa, inda kamar a Abuja da Legas, za a iya ƙirga adadin gidajen da ake sayar da shi, inda kuma a wasu manyan biranen ƙasar, ba a iya samu.
Wannan ya nuna cewa, ƴar ƙaramar nasara kwai, aka iya cimma a ƙarƙashin gwamnatin ta Bola Tinubu.Idan har ba a lalubo da mafita kan ƙarancin ba, masu ababen hawan da dama, za su koma yin amfani da Man Fetur, kamar yadda suka saba yi, a baya.
Gwamnatin ƙasar, ta san dabarun da ya kamata ta ɗauka domin kawo ƙarshen ƙarancin.Zuwan shirin, masu ababen hawan sun ɗauka ƙarashen kwanan su a gidajen Mai ta zo ke nan, saboda zuwa na CNG, amma sai gashi, sun sake komawa gidan jiya.
Ya zama wajbi, gwamnatin ta tabbatar da ta ƙara inganta shirin, musamman domin ta kawo ƴan ƙasar sauƙin sufuri.
Kazalika, ya kamata ta fafaɗa shirin domin janyo masu zuba jari daga kamfanonin masu zaman kansu, na cikin gida tare da kuma ɗaukar wasu matakan da suka wajaba, musamamin a kawo ƙarshen dogayen layukan da ske samu na sayen Iskar Gas ɗin.
