A wani sabon hari da ‘Yan bindiga suka kai sun sace mutane 16 a unguwar Angwan Pa da ke karamar hukumar Kajuru ta jihar Kaduna.
Wani mazaunin yankin wanda ya tabbatar da faruwar lamarin, ya ce maharan sun afkawa yankin a ranar Litinin da misalin karfe 7:30 na dare, sa’o’i 24 bayan harin ranar Kirsimeti da aka kai Angwan Aku, da ke karamar hukumar Kajuru, inda aka kashe mutum 1 tare da jikkata wasu da sace mutum 45.
- Wani Shahararren Dan Bindiga Ya Shiga Hannun ‘Yansanda A Jihar Kaduna
- ‘Yan Bindiga Sun Kashe Mutum 37 Tare Da Kone Gidaje Sama Da 100 A Garin Kaura, Kaduna
Mazaunin yankin wanda ya bukacu a sakaya sunansa, ya ce ‘yan bindigar sun mamaye yankin ne da misalin karfe 7:30 na dare inda suka kewaye kauyen, suka yi ta yin harbe-harbe.
Ya ce yayin kai harin sun yi awon gaba da mutane 53 amma 37 daga cikinsu sun tsere inda suka koma gida a safiyar ranar Talata, inda suka yi garkuwa da 16.
A cewarsa, kananan kauyukan da ba su da yawa a yanzu ‘yan bindigar ne ke kai hari, yana mai jaddada cewa: “Ba mu yi tsammanin ‘yan bindigar za su kai wa Anguwan Pa hari ba, domin bayan harin da aka kai wa Anguwan Aku a ranar Lahadin da ta gabata, an tura sojoji domin kwantar da tarzoma a yankin.
“’Yan bindigar sun zo ne da misalin karfe 7:30 na yammacin jiya ramar Litinin inda suka kewaye kauyen. Yawancin lokaci suna zuwa da yawa sosai dauke da makamai.
“Za su shiga cikin yankin kawai, kafin ku ankara, sun riga sun kewaye ko’ina.
“Idan ka gudu za su harbe ka su kashe ka. Ba su saba shiga manyan yankuna da ke da yawan jama’a ba.
“Suna kai hari kananan kauyukan da ba su da mutane da yawa. Ba sa kuskura su shiga manyan kauyuka domin su ma suna tsoron asarar rayukansu.
“Yawancin mutanen karkara a Kajuru suna rayuwa ne cikin tsoro da fargaba.” A cewarsa.
An tuntubi, Kakakin Rundunar ’Yan sandan Jihar Kaduna, DSP Muhammad Jalige, don jin halin da ake ciki kan sabon harin sai dai bamu samu amsa ba har zuwa lokacin hada wannan rahoto.
