Shirin Raya Noma da Kiwo na Jihar Kano (KSADP) ya yi rigakafin dabbobi sama da miliyan 5.5 a faɗin jihar a cikin shekaru uku da suka gabata, a wani ɓangare na ƙoƙarin ƙara darajar kiwo da bunƙasa samar da abincin dabbobi. Mai kula da shirin, Ibrahim Garba Muhammad, ya bayyana hakan a wata hira da Weekend Trust, inda ya ce aikin rigakafin na ci gaba da gudana domin cimma cikakken burin da aka sanya a gaba.
Muhammad ya bayyana cewa Kano ta zarce sauran jihohi wajen kula da lafiyar dabbobi, inda ta yi rigakafin fiye da miliyan 2 cikin shekaru uku, tare da zuba sama da naira biliyan 1 wajen horas da makiyaya kan kula da madara. Ya ƙara da cewa KSADP ta samar da asibitin dabbobi a filin kiwon Danshosiya, tare da shuka ciyawar kiwo a hekta 2,000, da kuma bunƙasa wasu hekta 1,000 a yankuna 20 domin samar da abincin dabbobi ta hannun kamfanoni masu zaman kansu.
- Dalilin Manoma Na Rungumar Irin Farin Wake A Jihar Benuwe
- Masana Sun Bayyana Yadda Kasafin Kudin 2026 Zai Shafi Tsaro Da Ilimi Da Kiwon Lafiya
A ɓangaren ƙara darajar kiwo da samun kasuwa, shirin ya sabunta kasuwar Fura da Nono ta Kofar Wambai tare da samar da ɗakin sanyi don ajiya, wanda sama da mambobi 3,000 ke cin gajiyarsa. Haka kuma, an kammala cibiyoyin tattara madara 98, inda 40 daga cikinsu ke ɗauke da na’urorin sanyi masu aiki. A cewar Muhammad, idan duk cibiyoyin suka fara aiki, za su iya samar da litar madara miliyan 15 a duk shekara.
KSADP, wanda Bankin Raya Musulunci (IsDB) ke ɗaukar nauyinsa da kuɗi dala miliyan 95, ya kuma samar da cibiyoyin injinan noma guda uku a kowace mazaɓar sanata ta jihar Kano, tare da raba taraktoci 98 da injinan girbi 48. Rahotanni sun nuna cewa shirin ya samar da kuɗin kasuwa da suka kai naira biliyan 39.2, ya kara yawan amfanin gona daga tan 1.5 zuwa 4.5 a hekta, tare da ƙarin matsakaicin kuɗin shiga na manomi zuwa naira 972,462, lamarin da ke nuna gagarumin tasirin shirin ga tattalin arzikin jihar.
Discussion about this post