Sojojin saman Nijeriya (NAF) sun kai hari kan sansanonin ‘yan ta’adda da ke da hannu a hare-haren da suka faru a jihar Neja tsakanin ranakun 24 zuwa 26 ga Yuni, 2025.
Harin ya biyo bayan wani harin da ‘yan ta’adda suka kai a ranar 24 ga Yuni inda suka kashe Sojoji 17 tare da jikkata wasu 10.
- Sanatan Neja Ta Arewa Ya Yi Allah Wadai Da Kashe Sojoji A Mariga
- Atalanta Na Neman Yuro Miliyan 50 Daga Duk Kungiyar Da Ke Son Daukar Lookman
Kakakin NAF, Air Commodore Ehimen Ejodame, a cikin wata sanarwa ya bayyana cewa an kai hare-haren ne bayan samun sahihan bayanai game da gungun ‘yan ta’addan da ke shirya kai hare-hare da sace shanu a ƙauyukan Kakihun da Kumbashi.
“An tura jiragen sama don kai hare-hare masu sauri bisa saiti, inda aka kashe ‘yan ta’adda da dama, tare da lalata makamansu da kuma hana su yaɗuwa,” in ji Ejodame.
Ya kuma tabbatar da cewa NAF tana ci gaba da aiki tare da sauran hukumomin tsaro don tabbatar da zaman lafiya a duk faɗin ƙasar.
