Jami’an rundunar ‘yansandan jihar Ogun, sun cafko wasu ma’aurata, Taiwo Olutufesu da Salawa Oyenusi Ajalorun bisa zarginsu da sassara sassan jikin wata mata ‘yar shekara 26 mai suna, Oyindamola.
Mutanen sun kashe ta ne a yankin Ijebu Ode da ke a cikin jihar da nufin yin asiri ta hanyar hada baki da wasu mutane shida.
- Rundunar ‘Yansanda Ta Cafke Mutane 61 Da Ake Zargi Da Bangar Siyasa A Kano
- ‘Yansanda Sun Kashe ‘Yan Bindiga 3, Sun Kwato AK-47 2 A Bauchi
Jaridar LEADERSHIP ta ruwaito cewa, mutanen shidan sun hada da Lukuman Oladele da Koyade Ibrahim da Bello Akeem sai Alebiosu, Adabayo da Fatai Rasheed da kuma Fatai Jimo.
Mutanen sun cire mata kai da kafafu da kuma hannuwa da sauran sassan jikinta, inda suka sayar da kowane bangare na jikinta kan naira 30,000 da kuma akan naira 50,000.
Mai magana da yawun rundunar ‘Yansandar Jihar, Abinbola Oyeyemi, ya sheda wa manema labarai a garin Abeokuta cewa, an kamo wadanda ake zargin ne bayan samun wani mai suna Ojo Omolara wanda kuma makwabcin mariganyiyar ne ya gabatar da korafinsa a caji ofis din ‘yansanda na Ijebu Ode a ranar 28 ga watan disambar 2022.
Ya ce, daga baya kuma ne ‘Yansandan da suka yi sintiri suka gano gawarta, suka kai ta dakin ajiye gawarwarki.
Ya kuma bayyana cewa, wadanda ake zargin tuni sun amsa laifinsu.
