Gwamnatin Nijeriya da ƙasar Türkiye sun ƙarfafa haɗin gwiwar tsaro bayan cimma yarjejeniya kan kafa cibiyar horas da sojoji a Nijeriya. An cimma wannan matsaya ne tsakanin Ministan Tsaro, Janar Christopher Musa (mai ritaya), da takwaransa na Türkiye a taron Antalya Diplomacy Forum 2026.
Sanarwar da Ma’aikatar Tsaro ta Nijeriya ta fitar ta ce tawagar ƙasar ta haɗa da Ministan Tsaro, Babban Hafsan Sojin Sama, wakilin jakadancin Nijeriya a Türkiye, mai ba da shawara kan tsaro da sauran manyan jami’ai. Ta ce ganawar ta sake jaddada kyakkyawar alaƙar da ke tsakanin ƙasashen biyu tare da samar da yarjejeniyoyi masu muhimmanci domin ƙarfafa ƙarfin tsaron Nijeriya da tallafa wa manufar “Renewed Hope” ta Shugaba Bola Tinubu.
- Daga Watan Janairu Zuwa Satumban Bana Harajin VAT Na Kayayyakin Sayayyar Daidai Da Sari A Kasar Sin Ya Karu Da Kaso 4.4 Bisa Dari
- Adamawa Ta Tinubu Ce – Fintiri
- Za A Gudanar Da Cikakken Zama Na Biyar Na Kwamitin Tsakiya Na 20 Na Jamiyyar Kwaminis Ta Kasar Sin
- Sojoji Sun Ceto Mutane 2 Daga Hannun Mahara A Benue
- Kotu Ta Umarci El-Rufai Ya Kare Kansa Kan Zargin Yin Kutse A Wayar Ribadu
Daga cikin muhimman abubuwan da aka cimma akwai shirye-shiryen horaswa ga sojojin Nijeriya a fannoni kamar yaƙi da ta’addanci, da tattara bayanan sirri, da yaƙi da jiragen sama marasa matuƙi da kuma horon ayyukan Majalisar Ɗinkin Duniya. Haka kuma an amince da kafa babbar cibiyar horaswa a Nijeriya a matsayin cibiyar ƙwarewa ta dogon lokaci, inda Nijeriya za ta samar da wuri na wucin gadi da kuma gano wuri a gabar teku domin gina cibiyar ta dindindin.
Ɓangarorin biyu sun kuma amince da haɗin gwuiwa kan musayar fasaha, da horaswa da kula da kayan aiki da kuma haɗin gwuiwar ƙirƙira, tare da shirin zurfafa alaƙa ta hanyar dandamali kamar IDEF 2026.
Türkiye ta kuma nuna shirinta na tallafawa Nijeriya da na’urorin sa ido na zamani, jiragen sama marasa matuƙi da sauran kayan aiki, tare da fara tattaunawa kan tsaron iyakoki da musayar bayanan sirri, yayin da za a fara aiwatar da yarjejeniyar cikin matakai ciki har da horaswa da gina cibiyoyi a Nijeriya.
